DILI, 29 janeiru 2021 (TATOLI)-–Ministru Petróleu no Minerál, Víctor da Conceição Soares, hateten prosesu negosiasaun entre Timor Gás no Petróleu, Empreza Públika (Timor GAP,E.P) no Eletricidade de Timor-Leste, Empreza Públika (EDTL,E.P) hahú iha faze finalizasaun hodi asina kontratu ba fornesimentu kombustível ba sentrál elétrika Betanu.
“Ita-nia negosiasaun liuhosi prosesu naruk, ne’ebé ha’u hanoin Timor GAP no EDTL atu konklui sira-nia kontratu. Daudaun hein hela faze finál atu asina kontratu, hafoin Timor GAP hahú halo fornesementu kombustível ba sentrál elétrika sira,” Ministru Víctor hateten hafoin enkontru ho Primeiru-Ministru, Taur Matan Ruak, iha Palásiu Governu, sesta ne’e.
Notísia relevante: Reuniaun KM: deside Timor GAP fornese kombustível ba EDTL
Antes ne’e, empreza estatál ne’e identifika ona lote iha Hera no Betano hodi haree fasilidade ezistente husi empreza SACOM no ETO+, ne’ebé bele utiliza fornese kombustível iha sentrál elétrika hanesan atubele ajusta.
Hafoin halo negosiasaun, empreza SACOM hakarak Timor GAP uza fasilidade ne’ebé iha ona iha sentrál elétrika iha Betano.
Iha loron 30 setembru, Konsellu Ministru aprova alterasaun projetu dekretu-lei kona-ba partisipasaun Timor GAP fornese kombustível ba EDTL, nune’e permite fornesimentu nesesáriu no asegura funsionamentu sentru produsaun eletrisidade.
Aleinde ne’e, Timor GAP mós komunika ona ho empreza parseiru sira husi Singapura, Malázia, Taiwan no seluk tan hodi envolve iha prosesu fornesimentu kombustível.
Jornalista: Florêncio Miranda Ximenes
Editora: Julia Chatarina
