DILI, 31 janeiru 2021 (TATOLI)—Prezidente Autoridade (PA) RAEOA-ZEESM TL, Arsénio Paixăo Bano, hateten autoridade RAEOA sei kria ekipa ida hodi identifika problema labarik sira liuliu labarik Oé-Cusse-oan sira-ne’ebe mak faan sasán hanesan manu-tolun no pentolan iha Kapital Díli.
Notísia Relevante: Labarik Sira hosi RAEOA 40% Hala’o Atividade Faan Sasán iha Dili
Arsénio Paixão Bano hatutan, kona ba problema ne’e, oras ne’e daudaun Autoridade RAEOA iha ona planu ne’ebé mak di’ak atu rezolve problema labarik Oé-Cusse-oan sira-ne’ebé moris no faan sasán iha dalan-ninin sira-ne’e.
“Ha’u sei kria ekipa ida hodi identifika labarik sira-nia problema iha saida no iha ne’ebé. Seraké problema ekonomia liuliu atu selu osan ba eskola mak laiha, seraké problema edukasaun liuliu labarik sira-ne’e la asesu informasaun ba eskola ka oinsá. Ka iha ema ruma ne’ebé mak uza labarik sira-ne’e, atu bele hetan osan ka labarik hirak ne’e mak presiza duni osan. Ka labarik sira-ne’e, inan-aman laiha ka laiha kbiit iha orsamentu atu sustenta sira,” Arsénio Paixão Bano hateten ba Agência TATOLI liuhosi telefónika, relasiona ho komemorasaun Loron Mundiál Ba Labarik Sira iha Dalan Ninin ne’ebé mundu tomak selebra kada loron 31 janeiru, domingu ne’e.
Tanba ne’e, nia hatutan, daudaun ne’e nia parte buka uluk problema nia hun ne’e iha ne’ebé mak nia bele fó solusaun sira-ne’ebé mak adekuada.
Arsénio Bano hateten, objetivu hosi kria ekipa ida-ne’e mak atu estuda oinsá mak autoridade RAEOA bele halo serbisu koordenasaun, halo planu atu bele responde situasaun ida-ne’e.
Tamba ne’e, nia dehan, nia parte sei halo rekrutamentu ba ema profisionál sira iha área sosiál ninian, atu bele ajuda RAEOA hodi halo planu no halo koordenasaun ho nivel nasionál sosiál nian inklui mós Komisaun Nasionál ba Direitu Labarik (KNDL) atu bele hala’o estudu ida hodi bele hatene kondisaun moris labarik sira-ne’e.
“Ha’u agora halo ona termu referénsia ba rekrutamentu ema profísionalista iha área sosiaá nian,” nia dehan.
Nia hatutan, autoridade RAEOA mos sei halo sosializasaun ba familia sira liuliu inan-aman sira iha RAEOA atu bele identifika no rezolve problema sira-ne’ebé labarik sira-ne’e entfrenta, tanba kestaun labarik sira-nian sai ema hotu nia preokupasaun.
Nu’udar Prezidente RAEOA, nia dehan, nia parte preokupa tebes ho labarik sira-ne’ebe mak faan Manu Tolun no Pentolan iha Kapital Dili tanba labarik sira-ne’e barak mak hosi RAEOA.
“Dezde uluk kedas, ha’u preokupa ba labarik Oé-Cusse-oan sira-ne’ebé buka moris iha Kapitál Dili hodi faan sasán to’o agora,” nia dehan.
Arsénio Bano hatutan, bainhira ekipa sira-ne’e ramata hala’o ninia estudu iha Kapital Díli, liuliu hodi bele identifika labarik sira-nia problema iha saida no autoridade sei buka solusaun hanesan halo reintergasaun ba família no fasilita labarik sira-ne’e hodi bele asesu ba eskola sira iha Díli nune’e mós iha RAEOA.
Notísia Relevante: MEJD hakarak labarik sira faan manu-tolun, tama Ensinu Rekorrente
Jornalista: Domingos Piedade Freitas
Editór: Cancio Ximenes
