DILI, 01 fevereiru 2021 (TATOLI)- Defensór Públiku, Eustáquio Guterres, ne’ebé fó asisténsia legál ba arguidu NS hosi empreza Liran TECK hatama ona rekursu ba Tribunál Rekursu (TR) hodi kontra desizaun Tribunál Distritál Dili (TDD).
“Ami hatama rekursu iha loron 18 janeiru 2021 ba iha Tribunál Rekursu tanba despaxu juis iha primeiru interrogatóriu Tribunál primeira instánsia la justu no la tuir rekizitu iha artigu 183 iha kódigu prosesu penál,” Eustáquio Guterres, informa ba Agência TATOLI iha TDD, segunda ne’e.
Notísia Relevante : Kazu internet ilegál, jestór na’in-rua hosi Liran TECK sai arguidu
Nia konsidera nia kliente nu’udar arguidu la envolve direita ba krime ne’ebé Ministériu Públiku (MP) akuza ba tanba arguidu iha lisensa ba kompañia nian hodi selu taxa ba Estadu.
Tuir prosesu ho rekursu ne’e Tribunál Rekursu sei analiza ne’ebé laiha prazu hodi bele deside.
Iha loron 15 janeiru 2021, Tribunál Distritál Dili (TDD) liuhosi desizaun julgamentu primeiru interrogatóriu, Juiza prosesu Albertina deside aplika prizaun preventiva ba arguidu NS jerente kompañia Liran TECK nu’udar sidadaun indonézia no arguidu JB nu’udar diretór Liran TECK tribunál aplika medida aprezentasaun periódika.
Tribunál aplika prizaun preventiva ba arguidu NS tanba arguidu iha koñesimentu tékniku ba IT nian hodi dada liña internet ilegál hosi rai-li’ur mai Timor-Leste no mós hanesan sidadaun estranjeiru atu asegura iha prosesu investigasaun tuir mai.
Notísia Relevante : Defeza hosi empreza Liran TECK sei halo rekursu kontra TDD
Polísia Nasionál Timor-Leste (PNTL) liuhosi Polísia Nasionál Servisu Investigasaun Kriminál (PNSIK) iha loron 11 janeiru 2021, ezekuta mandadu detensaun hosi Tribunál Distritál Díli, ho númeru NUC 0166/20 PNSIK ba arguidu sira iha area Delta, Comoro, Dili.
PNSIK mós halo buska iha edifísiu Liran TECK hodi rekolla evidénsia hanesan ekipamentu aparellu Vsat ka Very Small Aperture Terminal, ne’ebé simu no fornese dadus ba satélite no mós Server ne’ebé mak uza hodi halo operasaun espesiál ba rede internet hodi fornese ba instituisaun balun.
Jornalista : Nelson de Sousa
Editór : Francisco Simões
