DILI, 01 fevereiru 2021(TATOLI)–Diretór Nasionál Empregu Esteriór, husi Sekretaria Estadu Formasaun Prorfisionál Empregu (SEFOPE), Filomeno Soares, informa mate-isin traballadór timor-oan Seasonal Worker Programme (SWP), Tomas Pereira, seidauk bele transporta mai Timor-Leste tanba sei kompleta administrasaun.
Tomas Pereira ho idade 25 husi munisípiu Bobonaro (hela iha Dili), hakotu iis tanba asidente tráfegu, iha domingu (10/01) dadeer iha Tasmánia, Austrália.
“Agora seidauk bele mai tanba hein hela prosesu balun hanesan ninia asuransi no seluk maka bainhira mate-isin sai husi Austrália mai Timor-Leste, tenke hetan sertifikadu mate orijinál, no foti osan balun husi kompañia ne’ebé matebian serbisu ba hafoin hakotu serbisu. Ha’u hanoin kompleta hotu dokumentu hirak ne’e mak foin bele mai,” Diretór Filomenu dehan ba Agência TATOLI via telefone, segunda ne’e.
Notísia relevante: Polísia Austrália hahú investiga asidente tráfegu traballadór timor-oan iha Tasmánia
Kona-ba kestaun tempu, parte SEFOPE seidauk iha serteza tanba sei trata dokumentu hirak ne’e.
Maski nune’e, tuir Diretór ne’e, parte SEFOPE kontinua halo hela serbisu hamutuk ho Embaixada Timor-Leste iha Austrália atu kontinua esforsu ba kestaun ne’e.
“Ami kontinua halo serbisu ho ita-nia reprezentante iha Austrália tanba sira maka reprezenta ita-nia nasaun mak bele atualiza informasaun ba ami kona-ba kestaun ne’e,” nia tenik.
Matebian hahú serbisu iha kompañia Tasmanian Berries iha tinan 2019, liuhosi SWP.
Jornalista: Natalino Costa
Editora: Julia Chatarina
