DILI, 02 fevreiru 2021 (TATOLI) – Sekretáriu Jerál Karketu Dili FC, Elizeu Isaac hateten, Karketu evita pronunsia nia jogadór estranjeiru ne’ebé mai atu reforsa Karketu iha époka 2021.
“Karketu nunka hakfodak klube ida iha Liga Timor. Karketu klube kampiaun, ne’ebé klube se de’it mak sosa tiha Cristiano Ronaldo mai mós ami sei la hakfodak,” Elizeu Isaac hateten ba Agência TATOLI iha Dili, tersa ne’e.
Nia dehan, agora daudaun janela transferénsia besik remata ona. Tanba ne’e jogadór lokál ne’ebé Karketu konfirma ona no iha hela prosesu asina kontratu hamutuk na’in 22 no na’in-tolu hosi estranjeiru ne’ebé seidauk públika loloos sira-nia identidade.
“Jogadór sira ami prepara hotu ona balu hosi selesaun nasionál no balun eis selesaun nasionál balun ami nia jogadór antigu duni, sira ne’e fiksu ona atu reforsa Karketu, jogadór estranjeiru na’in tolu, maibé agora ami lakohi fó sai lai sira nia identidade tanba buat hotu husik ba jogu mak ita haree,” Elizeu hateten.
Nia afirma, 2021 liga sei rame tanba Karketu sei la nonook hodi firme iha pozisaun katak klube na’in ba kapitál Dili sei la fó fatin ba klube seluk.
Klube hirak ne’ebé daudaun ne’e kontratu ona jogadór estranjeiru mak hanesan, Boavista FC Timor, Lalenok United FC, Assalam FC no seluk tan.
Jornalista : Hortencio Sanchez
Editór : Francisco Simões
