Governu Austrália sei rekruta tan traballadór timor-oan na’in-150

DILI, 03 fevereiru 2021 (TATOLI)–-Diretór Nasionál Empregu Exteriór husi Sekretaria Estadu Formasaun Profisionál no Empregu (SEFOPE), Filomeno Soares, informa Governu Austrália kontinua hatudu prontidaun halo rekrutamentu traballadór timor-oan atu bá serbisu iha Austrália.

“Foin daudaun ami halo enkotru ho parte Embaixada Austrália hodi ko’alia kona-ba kestaun traballadór iha Austrália no iha enkontru ne’e Embaixadór hato’o Governu Norte Territóriu Austrália hakarak halo rekrutamentu ba ita-nia traballadór na’in-150,” Diretór ne’e dehan ba Agência TATOLI via telefónika, kuarta ne’e.

Tuir Diretór Nasionál SEFOPE, traballadór ne’ebé liu vaga sei serbisu iha empreza ai-fuan ida iha Norte Territóriu Austrália.

Nia dehan, SEFOPE sei halo selesaun hafoin hetan konfirmasaun husi parte Austrália.

“Traballadór sira ne’e maioria husi Seasonal Worker Programme (SWP) no ami sei halo selesaun,” nia akresenta.

Tuir dadus SEFOPE, husi tinan 2014 to’o 2018, timor-oan hamutuk 2.819 maka serbisu ona iha Austrália liuhosi SWP iha área ospitalidade no ortikultura no konsege rekolla retornu milliaun $9.698.579,15 mai Timor-Leste.

Iha tinan 2012 traballadór hamutuk 12, tinan 2013 traballadór na’in-36, 2014 ema na’in-131, 2015 na’in-181, 2016 iha traballadór na’in-298, tinan 2017 na’in-782, 2018 ema na’in-1.380 no 2019 ema lima.

Iha área ortikultura traballadór mane hamutuk na’in-1.823 no feto 744, enkuantu iha ospitalidade mane 187 no feto 95, ne’ebé husi númeru ne’e traballadór balun serbisu repetidu to’o dala-haat hafoin kompleta serbisu ho durasaun fulan-neen, bazea ba prestasaun serbisu traballadór iha kompañia sira.

Iha loron 02 dezembru 2020, traballadór timor-oan na’in-152 husi SWP aranka ba Tasmánia, Austrália.

Jornalista: Natalino Costa

Editora: Julia Chatarina