DILI, 04 fevereiru 2021 (TATOLI)–Komisaun F ne’ebé trata asuntu saúde iha Parlamentu Nasionál (PN) hahú halo audiénsia ho ekipa Ministériu Saúde kona-ba proposta-lei Númeru 21/V (2ª)-Lei Sistema Saúde.
Proposta-lei ne’e Ministériu Saúde submete ba Parlamentu Nasionál iha fulan-jullu 2020 liubá ne’e.
Ministra Saúde, Odete Maria Freitas Belo, hateten proposta-lei sistema saúde ne’e kona-ba vijilánsia sanitária no vijilánsia epidemilójika.
Ministra Saúde hetan krítika hosi estrutura Komisaun F kona-ba redasaun proposta-lei refere.
Nune’e, Ministra Odete argumenta ba Komisaun F, kestaun fallansu iha redasaun ne’e sempre akontese tanba proposta-lei ne’e Governu halo iha ámbitu estadu emerjénsia.
“Tempu ne’ebá ho ansi, tempu emerjénsia nian ita halo. Ami hanoin dehan presiza fó tempu ba Governu hadi’a fila-fali redasaun balun. Iha proposta-lei ne’e, ami diskute kona-ba vijilánsia sanitária no vijilánsia epidemilójika,” Odete Maria Freitas Belo ko’alia iha PN hafoin halo audiénsia ho Komisaun F, kinta ne’e.
Ministra Saúde hatutan, proposta-lei ne’e kona-ba vijilánsia sanitária no vijilánsia epidemilójika. Nune’e mós iha artigu ne’ebé mak ko’alia kona-bá vasina no imunizasaun.
“Iha vijilánsia sanitária ne’e ita haree liubá halo prevensaun. Se ita ko’alia kona-ba dezeinfetante sasán, fase-liman, buat sira-ne’e ita ko’alia barak liu ba iha autoridade vijilánsia no sanitária ninian. Se ko’alia kona-ba vijilánsia epidemilójiku entaun haree liuba kazu sira,” nia hateten.
Jornalista: Evaristo Soares Martins
Editór: Cancio Ximenes
