DILI, 04 fevereiru 2021 (TATOLI)-Tribunál Distritál Dili (TDD) adia julgamentu ba kazu omisídiu simples ne’ebé envolve hosi arguidu JA deskonfia oho vítima ida.
Tribunál labele halo julgamentu ne’e tanba sasin sira la marka prezensa no Tribunál mós antes ne’e notifika ona sasin na’in-tolu to’o dala-tolu.
Ministériu Públiku (MP) liuhosi prokuradór Domingos Barreto, husu Tribunál atu justifika sasin la marka prezensa iha audiénsia no bainhira laiha justifikasaun tuir regra prosesuál dentru loron-lima tenke aplika multa no mandadu detensaun.
Julgamentu ne’e adia fila-fali julgamentu ba iha 18 fevereiru, tinan ne’e, iha tuku 4:00 Otl.
Tuir kronolojia katak, kazu ne’e akontese iha Dili iha tinan 2017, arguidu hodi (gas lakrijimóniu) baku ba vítima iha nia hirus matan hodi rezulta monu no tenke evakua ba Ospitál Nasionál Guido Valadares (HNGV), maibé la konsege salva vítima nia vida.
Kona-ba faktu akuzasaun kompletu Tribunál seidauk lee sai tanba sesaun audiénsia ne’e seidauk la’o.
Jornalista : Nelson de Sousa
Editór : Francisco Simões
