DILI, 04 fevereiru 2021 (TATOLI)—Ministériu Saúde (MS) liuhosi koordenadora pilár III, Josefina Clarinha João klarifika katak, Timoroan ne’ebé detetadu pozitivu COVID-19 iha fronteira Mota-ain Atambua Indonézia, ikus-mai rezultadu negativu hafoin teste PCR iha kuarentena Batugade, Bobonaro, Timor-Leste.
Koordenadora pilár III ne’e esplika, Timoroan ne’e akompaña pasiente ne’ebé atu ba halo tratamentu iha Indonézia, maibé to’o iha postu Mota-ain Atambua, ekipa vizilánsia halo teste antigen no deteta pozitivu COVID-19.
Notísia Relevante:Kazu pozitivu COVID-19 aumenta ba 27
“Tanba ne’e hosi parte serbisu migrasaun Atambua nian haruka ita nia maluk ne’e fila-mai Timor-Leste,’’ Josefina Clarinha João esplika liuhosi konferénsia imprensa iha Palásiu Sinzas, kinta (04/02).
Bainhira to’o iha Batugade, ekipa vizilánsia submete kedan ba kuarentena hodi halo fila-fali teste konfirmasaun PCR ne’ebé rezultadu negativu.
Nia mós klarifika kona-bá modelu teste ne’ebé ekipa vizilánsia Timor-Leste no Indonézia uza hodi halo teste ba Timoroan ne’e katak, iha Atambua uza modelu espesífiku liu hanesan teste antigen no la hanesan ho teste PCR ne’ebé durante ne’e Timor-Leste uza, tanba hetan rekomendasaun hosi Organizasaun Mundiál Saúde (OMS).
Tanba ne’e, hosi rezultadu negativu ne’ebé iha, seidauk iha evidénsia forte katak iha ona transmisaun lokál iha Timor-Leste.
Oras ne’e daudaun, Timoroan ne’e tenke submete ba kuarentena durante loron 14 tanba Ministériu Saúde konsidera nia hakat liu fronteira terrestre ba Indonézia mak fila-mai TL.
Nune’e mós koordenadór pilár VII, Nilton da Silva via telefónika konta tuir kronolojia katak, Ministériu Saúde liuhosi Diresaun Nasionál Apoiu Hospitalár, transfere pasiente na’in sia (9) ho idaidak nia família ka ema ne’ebé akompaña hamutuk na’in ualu (8), totál na’in 17, iha kuarta loron 3 fulan fevereiru.
Ema hirak ne’e sai hosi edifísiu MS Caicoli iha tuku hitu dadeer, sira to’o iha fronteira iha tuku 10:00 no hakat-liu fronteira iha tuku 10:30 otl.
Bainhira rezolve tiha asuntu administrasaun nian iha serbisu migrasaun Indonézia, nia dehan, maluk Timoroan sira ne’e hala’o kedan teste antigen iha kuarentena Mota-ain, Indonezia.
Iha minutu balun nia laran, sira simu rezultadu teste no hatudu katak, Timoroan ida hosi na’in 17 ne’ebé akompaña pasiente ninia rezultadu pozitivu COVID-19.
Atu justifika liu tan rezultadu ne’e, Nilton dehan, ekipa saúde Mota-ain nian fó fali tempu minutu 30 hodi halo hikas teste ba dala-rua, maibé rezultadu pozitivu nafatin.
“Entaun, tuir portokolu hosi Indonézia nian katak, sira ne’ebé pozitivu ba virus ne’e tenke haruka fila no sira ne’ebé negativu mak bele kontinua viajen tama territóriu Indonézia. Ho desizaun ida ne’e mak sira haruka fila ita-nia maluk ne’e,” médiku ne’e konta tuir.
Koordenadór pilár hitu ne’e mós informa ba públiku katak, Timoroan sira ne’ebé atu ba Indonézia, ekipa MS halo teste PCR iha loron 2 fevereiru iha tuku 8:00 no rezultadu foti iha tuku 14:00, hosi na’in 17 ne’e rezultadu negativu hotu.
“Ho rezultadu ida ne’e mak Ministériu Saúde fasilita no refere atu sira halo viajen ba Indonézia,” nia subliña.
Doutór Nilton konsidera protokolu teste PCR ne’ebé durante ne’e Timor-Leste uza nu’udár goal standar ba COVID-19.
Jornalista: Felicidade Ximenes
Editór: Cipriano Colo
