DILI, 09 fevereiru 2021 (TATOLI)—Koordenadór Jerál Programa Cesta Bázika, Osório Florindo da Costa, informa implementasaun distribuisaun Cesta Bázika, ne’ebé tuir planu ramata iha fulan-fevereiru ne’e, daudaun foin to’o sorin balun, tanba ne’e posibilidade sei estende.
“Benefisiáriu ne’ebé simu ona foin 50%, enkuantu natureza Cesta Bázika universál, ne’ebé ema hotu tenke simu no labele esklui ema ida. Signifika populasaun 50% mak seidauk simu, entaun presiza tempu tan atu kontinua halo distribuisaun Cesta Bázika atu nune’e ema hotu iha direitu hetan,” Koordenadór ne’e dehan ba jornalista sira, hafoin reuniaun avaliasaun ba implementasaun programa Cesta Bázika ba ministériu implementadór sira ne’ebé hala’o iha Salaun TradeInvest, Colmera, tersa ne’e.
Notísia relevante: Rekuperasaun ekonómika: prevee millaun $113,4 ba medida haat kurtu prazu
Tanba ne’e, parte tékniku sira hamutuk ho ministériu implementadór sira envolve mós Ministériu Finansa atu avalia no atualiza progresu Cesta Bázika hodi haree karik iha nesesidade atu estende ka lae, nune’e bele foti desizaun ne’ebé tetu ba parte hotu.
“Ami tékniku hala’o de’it serbisu maibé desizaun polítika sira mai husi membru Governu. Sira deside dehan kontinua, ami kontinua, atu uza medida seluk mós ami prontu atu simu,” nia akresenta.
Produtu ne’ebé atu preve iha Cesta Bázika, Governu autoriza ona inklui foos importasaun tanba lei fó dalan, tanba ne’e sei vale bainhira lei ne’e seidauk halo alterasaun.
“Iha informasaun dehan foos laiha ona, tanba ne’e Ministru Koordenadór Ekonómiku rona no simu karta pur eskrita husi ajente implementadór sira, hato’o ba MKAE hodi halo desizaun tuir lei hodi autoriza foos importasaun iha Cesta Bázika, ne’e signifika ba foos sira ne’ebé iha ona merkadu,” nia hatutan.
Nia dehan, kuandu foos importasaun seluk ne’ebé tama mai fronteira ka nasaun seluk maka atu foin importa mai hodi envolve iha Cesta Bázika ne’e labele.
Jornalista: Natalino Costa
Editora: Julia Chatarina
