DILI, 09 fevereiru 2021 (TATOLI)—Asosiasaun advokasia, Tane Konsumidór no Universidade da Paz (UNPAZ) asina entendimentu atu fasilita estudante sira iha prosesu aprendizajen.
Hafoin seremónia asinatura entre instituisaun rua, Reitór UNPAZ, Adolmano Soares Amaral, hateten objetivu husi entendimentu ne’e maka atu introdús matéria protesaun direitu konsumidór no fasilita peskiza ba estudante.
“Kooperasaun Tane Konsumidór no UNPAZ ne’e kleur ona. Ohin ami formaliza akordu nune’e bele fasilita estudante kona-ba matéria protesaun direitu konsumidór, tanba iha universidade ne’e iha fakuldade direitu, tanba ne’e kooperasaun importante. Estudante sira durante ne’e ladún hatene saida maka protesaun direitu konsumidór, tanba ne’e ho koopersaun bele haklean koñesimentu,” Reitór UNPAZ informa, iha Universidade UNPAZ, tersa ne’e.
Aleinde ne’e, akordu ne’e mós ba futuru bele fasilita estudante UNPAZ halo peskiza iha Tane ninia fatin kona-ba protesaun direitu konsumidór tanba durante ne’e estudante halo prátika barak maibé menus koñesimentu kona-ba prátika.
Iha biban ne’e, Reitór UNPAZ kongratula Tane tanba bele koopera ona ho universidade ne’e.
Iha fatin hanesan, Prezidente Tane Konsumidór, António Ramos da Silva ‘Naikoli’, konsidera entendimentu ne’e importante atu eleva koñsimentu estudante fakuldade direitu.
“Durante ne’e sira la hatene kona-ba kestaun direitu konsumidór. Ami maka durante ne’e tau matan ba protesaun direitu konsumidór tanba ne’e ami prontu atu tulun estudante sira hodi eleva koñsimentu kona-ba matéria ne’e rasik,” nia akresenta.
Nia dehan, la’ós fó de’it matéria maibé Tane mós sei autoriza estudante UNPAZ halo peskiza hodi divulga informasaun sira hodi públika kona-ba protesaun direitu konsumidór.
Jornalista: Natalino Costa
Editora: Julia Chatarina
