DILI, 10 fevereiru 2021 (TATOLI)—Konsellu Ministru aprova alterasaun dahuluk, proposta husi Primeiru-Ministru, Taur Matan Ruak, ba dekretu Governu númeru 3/2021, loron 29 janeiru, kona-ba medida ezekusaun ba deklarasaun Estadu Emerjénsia (EE) husi dekretu Prezidente Repúblika númeru 6/2021, loron 27 janeiru.
Ho alterasaun ne’e, Ministru Interiór (MI) hafoin simu paresér husi Ministériu Saúde (MS) mak bele fó autorizasaun prévia ba ema estranjeiru sira ne’ebé tama territóriu nasionál liuhosi pontu entrada sira.
Ministru Prezidénsia Konsellu Ministru, Fidelis Manuel Leite Magalhães, hateten autorizasaun ne’e tenke husi órgaun Governu ne’ebé responsável ba servisu imigrasaun tanba ezijénsia agora atu intensifika kontrolu fronteira terrestre.
“Nune’e bele garante koordenasaun di’ak liu entre departamentu governamentál sira ne’ebé responsável ba jestaun lokál durante períodu aplika kuarentena no servisu migrasaun hanesan responsável ba kontrolu legalidade ema tama ba territóriu nasionál,” Ministru Fidelis informa, hafoin reuniaun ezekutivu, iha Palásiu Governu, tersa ne’e.
Tuir Portavós Governu, objetivu husi alterasaun ne’e atu fasilita liután koordenasaun relasiona ho kontrolu ba fronteira sira.
“Antes ne’e, bainhira ema atu tama mai ita-nia rai iha situasaun Estadu Emerjénsia husi fronteira terrestre, tenke ba uluk postu konsulár sira no tenke hetan aprovasaun husi Ministériu Negósiu Estranjeiru no Inkluzaun (MNEK) maibé ho alterasaun ida-ne’e la presiza ona,” nia akresenta.
MI mak iha kompeténsia atu taka no loke fronteira terrestre inklui aeroportu sira.
Bainhira entidade sira ne’ebé maka hakarak atu mai hosi rai-liur, sira sei husu autorizasaun husi MI ho koordenasaun ministériu relevante sira hanesan MNEK, MS no Ministériu Transporte no Komunikasaun (MTK).
Jornalista: Antónia Gusmão
Editora: Julia Chatarina
