DILI, 10 fevereiru 2021 (TATOLI)—Komisária Komisaun Nasionál Direitu Labarik (KNDL), Dinorah Granadeiro, hateten KNDL nia polítika iha 2021 ne’e kontinua fó hanoin ba ministériu sira atu tau atensaun liuliu halo protesaun no promosaun ba labarik sira.
Notísia Relevante: Labarik TL hela permanente iha dalan ninin seidauk iha
“Ita kontinua haforsa no fó hanoin ba ministériu relevante sira atu presiza tau atensaun ba protesaun no promosaun ba labarik sira,” Dinorah Granadeiro hateten ba Agência TATOLI liuhosi telefónika, kuarta ne’e.
Nia hatutan, KNDL kontinua rekomenda ba Minsitériu Solidariedade Sosiál no Inkluzaun (MSSI) atu labarik sira bele hetan bolsa da mãe nune’e bele apoiu labarik sira- nia eskola.
Ho aprosimasaun KNDL nian ba labarik sira iha dalan ninin, nia dehan, sira halo kontaktu ho Diretór Jerál MSSI, Rui Manuel Gago Exposto, no mós ho Diretór Nasionál Reinsersaun Komunitária, Floréncio Pina.
“Kona-ba munisípiu sira, ami iha kontaktu regulár ba vogál labarik nian, bainhira ami kontaktu ruma ne’ebé hetan keixa ne’ebé mak liga ho asuntu labarik sira. Ho ne’e, ami liga kedas ba ami-nia Ofisiál Protesaun Labarik (OPL) iha munisípiu sira, nune’e mós liga ba ministériu sira atu labarik sira bele hetan protesaun lalais,” nia hateten.
Aleinda-ne’e, Dinorah Granadeiro afirma tan, liga mós ba Diretór Ensinu Báziku no Diretór Jerál Planeamentu Polítika Jéneru nian hodi oinsá mak parte relevante presiza foti asaun imediata hasoru problema asuntu labarik nian no bele responde.
Nia dehan, tinan ne’e KNDL seidauk rekolla dadus labarik iha dalan ninin maibé KNDL rekolla tinan kotuk nian de’it no kestaun hanesan akontese iha munisípiu mak barak liu. Maibé bainhira kazu ne’e akontese hasoru labarik sira, parte KNDL foti kompeténsia hanesan komisária hodi liga direta ba parte polítika ka nível altu sira para fó resposta.
“Tanba ami Komisaun Nasional Direitu Labarik nia haree mak atu asegura de’it polítika ne’e, la’o ka lae, liuliu liga ba planu implementasaun nian. Maibé ba implementasaun nian ne’e parte MSSI nia kompeténsia,” nia dehan.
Tanba, tuir nia, Komisaun Nasionál Direitu Ba Labarik (KNDL) nia knaar no funsaun mak atu proteje no promove direitu labarik sira nian iha Timor-Leste.
“Bainhira ami simu informasaun ruma hosi ema ka ami la’o mak hetan labarik iha dalan, mak faan sasán depois la eskola, ami liga direta ba parte edukasaun nian atu fasilita labarik hodi fila ba eskola liuliu asesu ba eskola públiku sira. Karik sira presiza apoiu ruma, ami liga fali ba Ministériu Solidaridade Sosiál no Inkluzaun (MSSI),” Dinorah Granadeiro hateten.
Jornalista: Osória Marques
Editór: Cancio Ximenes
