DILI, 11 fevereiru 2021 (TATOLI)—Janeiru to’o dezembru 2020, Hospitál Nasionál Guido Valadares (HNGV) halo atendimentu ba pasiente hamutuk 22.652.
“Pasiente hirak ne’e ho kategoria Medisina interna, sirurjia, pediatria, Obstetrisia, Jinekolojia, asidente tráfiku no violénsia,” Diretór Asisténsia Klíniku HNGV, Flavio Brandão hateten ba jornalista Agência Tatoli iha serbisu fatin, kinta (10/02).
Hosi númeru 22.652, iha Medisina interna 5.458, pediatria 2.507, Sirurjia jerál 2.875, obstretrisia 7.634, jinekolojia 2.071, Intensive Care Unit (ICU) 232 no neo perinatolojia 1.875.
Alende ne’e pasiente ne’ebé alta hamutuk 21.687, hosi medisina interna 4.996, Sirurjia jerál 2.791, pediatria 2.310, obstretrisia 7.614, Jinekolojia 2.070, ICU 146, neo perinatolojia 1.760.
“Pasiente iha medisina interna hamutuk 178, mate 317. Iha sirurjia jerál alta 58, mate 27. Pediatria alta 99, mate 78. Obstetrisia alta ida, mate rua. Jinekolojia alta rua, mate ida. ICU alta 32, mate 53. Neo perinatolojia alta 83, mate 56 ho totál 987,” nia subliña.
Doutór Flavio Brandão mós esplika kona-bá pasiente medisina interna ne’ebé halo observasaun hamutuk 2.290, baixa 3.047, alta 9.260 ho totál 14.597. Parte Sirurjia jerál ne’ebé halo observasaun 1.330, baixa 1.178, alta 2.873 ho totál 5.381. Pediatria ne’ebé halo observasaun 1.829, baixa 2.195, alta 6.577 ho totál 10.601. Obstetrisia jinekolojia ne’ebe halo observasaun 522, baixa 3.041, alta 823, totál 4.386. Pasiente ho kazu asidente tráfiku ne’ebé halo observasaun 173, baixa 282, alta 585 ho totál 1.043. Pasiente ho kazu violénsia ne’ebé halo observasaun 68, baixa 78, alta 148 ho totál 294.
Hosi totál pasiente ne’ebé iha, Flavio Brandão halo komparasaun ho dadus tinan 2019 ne’ebé HNGV rejista hamutuk 21.937 no konsidera iha progresu tanba razaun barak, liuliu estrada komesa di’ak ona hodi fasilita movimentu transporte bele transporta pasiente hosi área rurál.
Ho progressu ne’e mós parte HNGV konsidera katak profisionál saúde iha Ospitál Rejionál, Referál no Sentru Saúde sira iha territóriu tomak komesa book aan neineik.
Nune’e, iha komemorasaun loron mundiál ba ema moras iha tinan 2021, parte HNGV apela ba ema hotu-hotu atu hadook aan hosi moras oioin.
“Sira ne’ebé moras hela, reza atu sira di’ak lalais liu hosi asisténsia ne’ebé oferese hosi médiku, parteira no enfermeiru sira,” nia apela.
Oras ne’e daudaun profisionál saúde ne’ebé serbisu iha HNGV kompostu hosi médiku espesialista 35, médiku jerál 77, enfermeiru 334, asistente enfermeiru 21, parteira 62, tékniku aliadu sira 137, médiku Kubanu 49, médiku Xineza 16 no serbisu administrasaun 128.
Jornalista: Felicidade Ximenes
Editór: Cipriano Colo
