DILI, 10 fevereiru 2021 (TATOLI)—Governu sei halo hela analiza ba tipu ai-moruk ne’ebé merese atu sosa hodi halo vasinasaun ba COVID-19 iha Timor-Leste (TL).
“Konsellu Ministru sei halo diskusaun no seidauk hetan entendimentu ruma atu kontinua sosa ai-moruk vasina AstraZeneca ho orsamentu ne’ebé ita atu prevee tanba ema sei kestiona ninia efikasia. Enkuantu, iha tan ona ai-moruk seluk ne’ebé modernu-liu hanesan Pfizer no seluk tan. Nune’e ita sei buka informasaun ruma atu konvense fila-fali KM hodi hetan aprovasaun,” Ministra Saúde, Odete Maria Freitas Belo, ba jornalista sira iha Palásiu Governu, kuarta (10/02).
Notísia Relevante:COVAX Facility oferese millaun $7 ba vasinasaun AstraZeneca iha TL
Maski nune’e, Odete hatutan, durante diskusaun ko’alia liu kona-bá ai-moruk vasina AstraZeneca ne’ebé konsidera seguru liu no Organizasaun Mundiál Saúde (OMS) rasik fó sai katak, ninia efikasia liu 50% atu bele uza.
“Signifika ai-moruk ne’e di’ak atu ita bele uza, no ita presiza karta justifikasaun ida hosi OMS nune’e bele hetan aprovasaun iha KM,” nia subliña.
Kona-bá orsamentu 80% ne’ebé sei finansia hosi Governu, nia dehan, Konsellu Ministru seidauk halo diskusaun, maibé apoiu 20% ne’ebé parseiru sira fó sei to’o mai TL iha fulan fevereiru-nia rohan hodi hahú vasinasaun.
Notísia Relevante:Governu sei sosializa vasinasaun AstraZeneca durante fulan rua
Jornalista: Felicidade Ximenes
Editór: Cipriano Colo
