DILI, 12 fevereiru 2021 (TATOLI)—Kompañia Heineken husi inisiativa no responsabilidade sosiál, liuhosi programa ‘economic power woman’, fasilita feto na’in-12 halo negósiu kiik.
Diretora Relasaun Públika Heineken, Filomena Filipe, hateten Heineken asegura katak programa ne’e bele la’o ho susesu durante tinan-ida nia laran, liuhosi kapasitasaun inan feton sira ne’ebé hakarak loke negósiu no kontinua halo buras nafatin atu nune’e labele falla iha dalan klaran.
“Tinan ne’e ami hakarak apoiu feto maluk ne’ebé hakarak halo negósiu kiik hanesan tunu sate iha estrada ninin. Ami tulun sira atubele iha kontinuasaun ba negósiu husi kiik to’o boot,” Diretora ne’e informa liuhosi konferénsia imprensa ne’ebé hala’o iha Timor Loudge Comoro, sesta ne’e.
Objetivu husi programa ne’e maka atu apoiu dezenvolvimentu ekonomia feto iha rai laran no promove kreatividade.
“Enkoraja sira atu hamosu kreatividade foun iha sira-nia bairru rasik, sai independente no forte liu no mós dezenvolve emprezáriu feto iha ambiente ne’ebé sustentável,” nia akresenta.
Heineken sei kria ativasaun iha negosiante nia fatin hodi dezenvolve negósiu liuhosi halo promosaun iha rede sosiál.
“Ami fó materiál hodi ajuda sira atu asegura sira-nia negósiu hodi bele la’o, hanesan materiál sumbriña boot hodi fa’an iha okos, fatin tunu sate no cool box,” nia hatutan.
Iha fatin hanesan, Xefe Departementu Negósiu Tiger Street Food, Ana Guterres, hateten atividade ne’e nu’udar meiu ida atu rekoopera ekonomia iha tempu pandemia COVID-19.
Nune’e mós, Diretór Nasionál Empreendimentu Atividade Produtu Turiztiku husi Ministériu Turizmu, Komérsiu no Indústria (MTKI), Julio Ximenes Ribeiro, hateten parte diresaun kontinua apoia nafatin maluk sira ne’ebé halo negósiu kiik sira liuhosi loke dalan rejista negósiu bainhira sira presiza.
Aleinde ne’e, Benefisiária programa Heineken, Domigas da Silva, apresia kompañia ne’ebé halibur negosiante kiik hodi kontinua hala’o negósiu.
Tuir negosiante ne’e, ho apoiu ne’e bele hadi’a kondisaun negósiu no hetan apresiasaun husi ema barak.
Liuhosi okaziaun ne’e, Heineken fahe sertifikadu formasaun ba benefiáriu na’in-12 ne’ebé antes ne’e hetan ona formasaun.
Jornalista: Natalino Costa
Editora: Julia Chatarina
