Projetu edifísiu CFP lori Liborio Pereira ba hatán iha Tribunál Kamara Konta

DILI, 15 fevereiru 2021 (TATOLI)- Tribunál primeira instánsia Kamara Konta, segunda (15/02/), loke audiénsia ba julgamentu responsabilidade finanseira sansionatóriu no reintegratóriu hasoru eis Prezidente Komisaun Funsaun Públika (CFP), Liborio Pereira.
Julgamentu Kamara Konta ne’e uza rejime prosesu penál komún iha artigu 60 númeru 2 alínea b no Ministériu Públiku (MP) nu’udar reprezenta Estadu mak hatama prosesu kontra demandadu Liborio Pereira tuir lei orgánika Kamara Konta iha artigu 44 númeru 4 ne’ebé regula kona-ba responsabilidade finanseira sansionatóriu no reintegratóriu.
Notísia Relevante : Polísia detein eis prezidente CFP iha MNEC

Prosesu ne’e relasiona ho rezultadu auditória Kamara Konta hatudu katak desizaun eis Prezidente CFP, Liborio Pareira, halo adjudikasaun direita ba projetu konstrusaun edifísiu Komisaun Funsaun Públika (CFP) deskunfia iha indikasaun ka posibilidade mosu irregularidade viola lei hodi fó prezuiju ba Estadu.
Projetu ba edifisísiu CFP iha area Matadouru, Dili, hahú iha tinan 2010. Tuir faktu ne’ebé arrola hosi MP mós katak, prosesu konstrusaun edifísiu foun CFP ne’ebé la liu hosi konkursu públiku (tenderizasaun) hodi halo de’it adjudika direita no mós ba prosesu tékniku dezeñu no empreza ne’ebé demandadu Liborio Pereira adjudika direita mak hanesan, kompañia konsultóriu Pires Architect no kontraktór Timor-Leste Indepedence Construction, Lda (TLIC).
Tuir proposta ka rekerimentu MP nian kona-ba responsabilidade finanseiru sansionatóriu ho kustu $10,000.00 no responsabilidade reintegratóriu ho kustu $30,000.00 atu demandu selu fila-fali ba Estadu.
Parte defeza husu Tribunál aseita pedidu hodi halo tentativu konsiliasaun ho parte Estadu ne’ebé reprezenta hosi Ministériu Públiku, nune’e Tribunál defere (aseita) pedidu defeza aprezenta fila-fali karta por eskritu kona-ba responsabilidade reintegratóriu no responsavilidade sansionatóriu Tribunál Kamara Konta mak sei deside.
“Tanba ne’e liuhosi tentativa konsiliasaun ne’e bainhira bele fó solusaun sei junta iha autos atu konvense Ministériu Públiku nu’udar reprezenta Estadu ho Tribunál hodi omóloga,” Juis Konselleiru, Duarte Tilman esplika iha sala audiénsia Tribunál Rekursu.
Liuhosi audiénsia julgamentu ne’e parte demandadu liuhosi ninia mandatóriu Defensor Públiku, Sergio Quintas, hateten prosesu responsabilidade finanseiru reintegratóriu ne’ebé nia kliente atu selu fila-fali ba Estadu ho montante boot. Tanba demandu daudaun ne’e hanesan funsionáriu públiku nia prontu atu selu fila-fali osan ne’ebé iha, maibé tuir saláriu ne’ebé iha ka sei selu tuir empréstimu.
Prokuradór Pascásio de Rosa Alves, hateten tuir lei prosesuál ba sansionatóriu no reintegratóriu iha atu define. Ho nune’e, nia husu ba demandadu liuhosi nia defensór públiku atu bele dezigna fila-fali pedidu ka proposta por eskritu ba Tribunál hodi diskute iha tempu tuir mai.
Hafoin rona parte sira, Tribunál husu ba demandadu atu hakerek karta pedidu eskritu kona-ba atu fiksa montante osan hodi bele selu empréstimu atu aprezenta ba iha Tribunál hodi parte sira bele diskute konsiliasaun fila-fali iha julgamentu tuir mai no bainhira iha ona konsiliasaun parte sira aseita malu prosesu ne’e la presiza avansa ba oin atu rona testemuña sira ne’ebé MP ho demandadu halo inskrisaun ka arrola. Nune’e Tribunál deside adia fila-fali julgamentu ne’e ba iha loron 23 fevereiru, tinan ne’e, iha tuku 10:00 Otl.
Jornalista : Nelson de Sousa
Editór : Francisco Simões

