DILI, 16 fevereiru 2021 (TATOLI)—Aviaun ambulánsia ne’ebé governu Timor-Leste (TL) kontrata hosi kompañia Mision Aviation Fellowship (MAF) iha 2020, labele halo operasaun hodi tula pasiente emerjénsia hosi munisípiu mai Hospitál Nasionál Guido Valadares (HNGV) desde fulan dezembru to’o ohin loron tanba pilotu iha hela Austrália.
“Hosi fulan dezembru to’o agora ha’u rona aviaun la semo tanba pilotu iha hela Austrália,” Diretór Nasionál Servisu Ambulánsia Emerjénsia no Médiku (DNSAEM), Horácio Sarmento hateten ba jornalista Agência Tatoli iha serbisu fatin, tersa (16/02).
Diretór Horácio Sarmento esplika, iha janeiru nia-rohan ekipa MAF hasoru-malu ona ho parte DNSAEM atu informa kona-bá pilotu ne’ebé hakarak atu fila-fali mai TL maibé lakohi submete ba kuarentena obrigatóriu no hakarak halo auto-kuarentena.
“Ita-nia Lei la autoriza tanba Estadu emerjénsia da-sanulu regula kualkér sidadaun tenke halo kuarentena obrigatóriu no diplomata de’it mak halo auto-kuarentena tanba ne’e mak nia seidauk bele mai,’’ Horácio Sarmento subliña.
Diretór ne’e hatutan, Ministériu Saúde kontrata aviaun ne’e liuhosi asina Memorandum of Understanding (MoU) atu fasilita tranferénsia urjente ba pasiente ne’ebé tama kategoria emerjénsia hosi munisípiu mai HNGV.
“Kontratu ne’e la kesi ho orsamentu maibé ita asina de’it MoU ida atu bainhira presiza urjenje ita husu apoiu depois selu kedan bazeia ba ezekuasaun hosi kada munisípiu,” nia dehan.
Tuir akordu ne’ebé hatuur iha kontratu deside ba-mai Dili-Ataúro Governu selu kedan $320, karun liu mak munisípiu Lautém ho Oe-cusse ba-mai $900 no tuir-kedan Viqueque $600.
“Ida ne’e ita halo ba pasiente ne’ebé presiza duni atendimentu hosi espesialista hanesan moras kurasaun,’’ nia akresenta.
Oras ne’e daudaun DNSAEM observa katak maski aviaun ambulánsia ne’e para kleur ona maibé kondisaun diak hela.
Entretantu Ministériu Sáude asina kontratu ho kompañia Mission Aviation Fellowship (MAF) hodi oferese aviaun ambulánsia ne’e hahú hosi 2019 to’o fulan outubru 2021.
Jornalista: Felicidade Ximenes
Editór: Cipriano Colo
