Austrália apoia millaun $18.6 ba vasinasaun AstraZeneca iha TL
DILI, 19 fevereiru 2021 (TATOLI)—Governu Australianu oferese millaun $18.6 hodi sosa ai-moruk vasina AstraZeneca iha Timor-Leste (TL).
Embaixadór Austrália iha Timor-Leste, Peter Roberts hateten orsamentu ne’ebé Austrália fó sei utiliza millaun $3.8 atu fasilita hodi halo distribuisaun, edukasaun no monitorizasaun.
Notísia Relevante:COVAX Facility oferese millaun $7 ba vasinasaun AstraZeneca iha TL
”Ha’u sei ko’alia ho doadór sira atu serbisu hamutuk ho Governu Timor-Leste iha área oioin. Kona-bá COVAX facility ne’ebé apoia 20% ami mós prontu serbisu hamutuk ho TL atu sosa ai-moruk hirak ne’e. Tanba ne’e hosi ami-nia parte komesa fó no ezekuta ona,” Piter Roberts ba jornalista sira iha Ministériu Finansas, sesta ne’e.
Alende ne’e Austrália mós hatudu nia prontidaun ho kompromisu foun atu suporta Timor-Leste iha prosesu ba asesu vasinasaun AstraZeneca inklui sosa ai-moruk vasina seluk.
Antes ne’e Organizasaun Mundiál Saúde (OMS) liuhosi COVAX Facility ne’ebé hetan aprovasaun hosi United Nations International Children’s Emergency Fund (UNICEF) oferese millaun $7 ba Governu TL hodi fasilita mós vasinasaun AstraZeneca.
Apoiu millaun $7 ne’e gratuita atu sosa ai-moruk ba vasinasaun AstraZeneca 20% no orsamentu 80% Governu Timor-Leste mak sei prevee.
Notísia Relevante:TL iha kondisaun simu AstraZeneca
Jornalista: Felicidade Ximenes
Editór: Cipriano Colo
