DILI, 19 fevereiru 2021 (TATOLI)–Komandu Jerál Polísia Nasionál Timor-Leste (PNTL) hamutuk ho estudante universitáriu hosi Universidade Nacional Timor Lorosa’e (UNTL), Universidade da Paz (UNPAZ) inklui estudante tékniku vokasionál, kuda ai-oan hamutuk 150 iha área Cristo Rei.
Komadante Sentru Formasaun Polísia (CFP, sigla portugés), Superientidente Polísia Arquimino, hateten atividade ne’e ho objetivu atu evita inundasaun no rai monu.
“Ita haree Timor-Leste ne’e risku ba rai monu, entaun ita organiza malu ho Sentru Formasaun Polísia, Komandu Munisípiu Dili, komunidade, inklui estudante sira, halo karta ba Diresaun Nasionál Floresta horseik hodi ami foti ai-oan iha sentru viveiru iha postu administrativu Maubara no ohin ita kuda iha ne’e,” Komadante CFP dehan ba Agência TATOLI, iha Cristo Rei, sesta ne’e.
Tipu ai-oan ne’ebé kuda maka aikatapa, Ai Kasi no ai sira seluk tan, ne’ebé atividade hanesan halo ona iha área Comoro, Ailok-laran, no ba oin sei planeia kuda iha fatin seluk.
Biban ne’e, nia apela ba komunidade sira atu kuidadu ai-horis ne’ebé kuda ona no partisipa ativu kuda ai-oan hodi proteje ambiente.
Iha fatin hanesan, Estudante Eskola Tékniku Informátiku Dili, Verónica da Vinha da Costa, sente kontente tanba bele partisipa iha atividade proteje ambiente.
Nia dehan, presiza kuda ai-oan iha área Cristo Rei tanba fatin ne’e nu’udár fatin turizmu, aleinde ne’e bele halo fatin ne’e sai matak.
Nune’e mós, Estudante UNPAZ, Marcelo Carvalho de Deus, apresia tanba bele partisipa iha atividade ne’e, tanba bele proteje dezastre naturál no seluk tan.
Atividade ne’e organiza hosi PNTL iha semana kotuk no konsege kuda uluk ai-oan hamutuk 200-resin iha área Comoro.
Jornalista: Natalino Costa
Editora: Julia Chatarina
