DILI, 22 fevereiru 2021 (TATOLI)-Komisaun Anti-Korrupsaun (CAC), hahú loron 22 fevereiru to’o loron 31 jullu, tinan ne’e, arrola pesoál sira ne’ebé assume kargu xefia iha administrasaun públiku hodi submete ba prosesu deklarasaun riku-soin no bens interese.
Lei númeru 7/2020, 26 agostu kona-ba Medida Prevensaun no Kombate Korrupsaun (MPKK), segunda ne’e, tama ona iha vigór iha ámbitu komemorasaun aniversáriu CAC nian ba dala-XI.
Notísia Relevante : CAC sei aplika uluk rejime deklarasaun riku-soin ba instituisaun estratéjiku
Iha serimónia aniversáriu CAC nian ne’e divulga mós kona-ba prosesu no mekanizmu ba rejime deklarasaun rendimentu no bens hosi lei MPKK ba iha kargu xefia rekursu umanu hosi ministériu no instituisaun Estadu hotu, oinsá kontribui arrola dadus kargu xefia hosi diretór jerál to’o ba iha xefe departamentu sira ida-idak hodi fornese ba CAC.
Komisáriu CAC, Sergio Hornai, esplika prosesu arrolamentu dadus pesoál ne’ebé instituisaun ida-idak sei aprezenta relatóriu informasaun to’o iha setembru ba oin, tinan ne’e, hahú efetua servisu ba instituisaun hira mak arroladu hodi sujeita halo deklarasaun.
Nia dehan, faze primeiru CAC sei halo arrolamentu ba dadus pesoál hosi instituisaun hotu hafoin define mapeamentu instituisaun hira mak sei aplika uluk hodi deklara riku-soin.
“CAC forma ona ekipa tékniku ne’ebé sei servisu ho objetividade, integridade no tuir legalidade ne’ebé hatuur ho kuidadu,” Segio Hornai hateten ba jornalista sira iha salaun Ministériu Finansa, Dili.
Nia husu ba instituisaun Estadu hotu, liu-liu kargu xefia sira iha administrasaun públika atu kolabora no kontribui ba prosesu arrolamentu ne’e nu’udar devér ida tuir lei MPKK.
“Bainhira lakohi sujeita mak sei hetan sansaun disiplinár, administrativu ho penál,” afirma Sergio Hornai.
Jornalista : Nelson de Sousa
Editór : Francisco Simões
