DILI, 23 fevereiru 2021 (TATOLI)-Ministériu Turizmu, Komérsiu no Indústria (MTCI) sei dezenvolve tasi-ibun iha área jurizdisaun Dili nian sai fatin turizmu.
Ministru Turizmu Komérsiu no Indústria, José Lucas do Carmo da Silva, informa MTCI sei kria fasilidade sira hanesan fatin ba ema hariis, jardín infantíl, bar no restaurante ho fasilidade seluk tan iha área tasi-ibun baliza ho mota Comoro nian ba to’o iha Kristu Liurai.
Notísia Relevante : MJ-MTCI diskute kontratu arrendamentu ba pouzada sira
Ba planu MTCI nian ne’e, Ministru Justisa, Manuel Cárceres da Costa, fó apoiu másimu atu dezenvolve tasi-ibun Dili nian sai fatin turizmu tanba ne’e bainhira realiza planu ne’e MJ prontu atu kolabora atu hadi’a sidade Dili.
Ba Agência Tatoli, tersa ne’e, hafoin halo enkontru ho Ministru Turizmu Komérsiu no Indústria, José Lucas do Carmo da Silva, iha Ministériu Justisa, Caicoli, Dili, Ministru Manuel Cárceres da Costa, hateten tuir lei hosi área tasi -ibun ho distánsia metru 50 mai rai-maran ne’e rai Estadu nian no bandu ema harii uma. Ho nune’e, bainhira planu ne’e realiza sei hasai komunidade sira ne’ebé okupa ka halo uma besik tasi-ibun.
Iha enkontru ne’e parte sira diskute mós prosesu preparativus ba parke zona industriál turizmu ne’ebé ekipa téknika konjuntu ministériu rua ne’e nian identifika ona rai iha área Ulmera, Liquiça nian hodi bele realiza.
Jornalista : Nelson de Sousa
Editór : Francisco Simões
