DILI, 23 fevereiru 2021 (TATOLI)–Prezidente Konsellu Administrasaun Timor Gás no Petróleu, Empreza Públika (Timor GAP,E.P), António Loiola de Sousa, akompañadu hosi Ministru Petróleu no Minerál (MPM), Víctor da Conceição Soares, hasoru malu ho Primeiru-Ministru (PM), Taur Matan Ruak, hodi atualiza serbisu.
“Atualiza serbisu Timor GAP ba Primeiru-Ministru no simu mós orientasaun, hanesan ita hotu hatene katak empreza estatál ne’e ninia área haree ba upstream no downstream,” Prezidente Timor GAP hateten hafoin ramata reuniaun ho Xefe Governu iha Palásiu Governu, tersa ne’e.
Nia hatutan, bainhira relata serbisu ne’e, PM hakarak hatene atividade sira ne’ebé mak sai prioridade Timor GAP.
“Liuliu relasiona ho orsamentu ne’ebé mak aprova tiha ona iha Parlamentu Nasionál, Primeiru-Ministru hakarak hatene katak hafoin simu orsamentu, Timor GAP ninia prioridade oinsá,” nia haktuir.
Atividade sira ne’ebé mak Timor GAP relata ba Xefe Ezekutivu relasiona ho preparasaun perfurasaun mina-matan foun iha Suai, munisípiu Covalima inklui atividade sira seluk ne’ebé mak sai prioridade iha tinan 2021.
Jornalista: Antónia Gusmão
Editora: Julia Chatarina
