DILI, 23 fevereiru 2021 (TATOLI)—Timor Gás no Petróleu, Empreza Públika (Timor GAP,E.P) identifika ona empreza estranjeiru ida hosi nasaun Singapura hodi fornese kombustível ba sentrál elétrika Betano, Eletricidade de Timor-Leste (EDTL).
Prezidente Timor GAP, António Loiola de Sousa, hateten daudaun ne’e empreza estatál hamutuk ho EDTL halo hela diskusaun atu haree ba kontratu ne’ebé maka sei asina entre parte rua.
“Ami halo ona ezersísiu ho empreza balun ne’ebé serbisu ho ami atu fornese mina ba sentrál elétrika Betano. Empreza ne’e hosi Singapura, maibé ha’u labele temi nia naran, nia tuir ona prosesu aprovizionamentu hosi Timor GAP ho padraun internasionál ne’ebé transparénte, tanba ne’e empreza estatál tenke halo negósiu ho kualidade hanesan soberanu Estadu,” Prezidente Timor GAP informa hafoin ramata reuniaun ho Primeiru-Ministru (PM), Taur Matan Ruak, iha Palásiu Governu, tersa ne’e.
Notísia relevante: Timor GAP kontaktu kompañia hitu sai parseiru fornese mina EDTL
Tuir Dirijente ne’e, tempu badak sei asina kontratu ho empreza internasionál ne’e, no hafoin prosesu ne’e ramata, iha semana tolu ba oin Timor GAP bele hatama mina mai Timor-Leste.
Iha sorun seluk, empreza estatál ne’e kontaktu ona ninia parseiru sira hosi Malázia, Taiwan, Hongkong, Tailándia inklui Singapura.
Antes ne’e, iha loron 30 setembru 2020, Konsellu Ministru aprova alterasaun projetu dekretu-lei kona-ba partisipasaun Timor GAP fornese kombustível ba EDTL.
Jornalista: Antónia Gusmão
Editora: Julia Chatarina
