DILI, 24 fevereiru 2021 (TATOLI)-Komandu Polísia Nasionál Timor-Leste (PNTL) Munisípiu Dili liuhosi Servisu Rodoviáriu Unidade Tránzitu, durante loron 13 to’o loron 19 fevereiru 2021, halibur osan hosi infratór sira ho montante $4.220 hodi kontribui ba kofre Estadu.
“Osan lubun ne’e ami rekolla hosi infratór 116 ne’ebé lori transporte públiku, privadu viola lei kódigu estrada,” Komandante Tránzitu Munisípiu Dili, Inspetór Domingos Sarmento Gama, informa ba jornalista iha komandu PNTL Munisípiu Dili, kuarta ne’e.
Notísia Relevante : Asidente tráfiku rezulta vítima 27 kanek
Nia esplika, infratór sira viola lei kódigu estrada, hanesan para sala karreta ka motor iha fatin estrada públiku, dokumentu transporte nian inválidu ho sira seluk ne’ebé simu tiketi ka billete hosi polísia ba selu multa direita iha banku tanba ne’e balun ne’ebé seidauk selu multa atu bele selu.
Nia husu nafatin motorizada sira atu bele konsiénsia utiliza estrada públiku ho konsiénsia no kumpre nafatin sinais tránzitu ne’ebé estabelese ho fatin estasionamentu koloka iha Kapitál Dili.
Jornalista : Nelson de Sousa
Editór : Francisco Simões
