DILI, 25 fevereiru 2021 (TATOLI)—Fundu Dezenvolvimentu Kapitál Umanu (FDCH sígla potugés) prevee ona millaun $1.5 atu apoia programa bolsa hakbiit ba estudante-sira ne’ebé integra iha Ensinu Superiór Públiku no Privadu-sira.
Diretora Ezekutiva FDCH, Leila Cárceres dos Santos, hateten kada bolseiru sei hetan kustu vida $120 kada fulan hodi kobre sira-nia alozamentu, transporte, alimentasaun no ekipamentu didátiku.
Notísia Relevante:MESSK entrega esbosu Dekretu-Lei rejimi hakbi’it ba KM
“Molok implementa sei iha kontratu ho bolseiru-sira. Bainhira bolseiru ida mak to’o dalan-klaran la konsege kontinua ninia-estudu sei hetan sansaun,” Leila Cárceres dos Santos hateten ba jornalista-sira iha salaun enkontru Ministériu Ensinu Superiór Siénsia no Kultura (MESSK) Colmera, kinta ne’e.
Sansaun ne’ebé hatuur iha kontratu, nia dehan, estudante tenki devolve fila-fali metade hosi osan ne’ebé Governu apoia.
“Sansaun ne’e sei implementa bazeia ba tipu kauza ne’ebé sira enfrenta atu motiva sira hodi bele eskola ho loloos,” nia subliña.
Tuir planu, nesesidade bolseiru sira-nian sei hetan kada fulan no kona-bá propinas Governu sei transfere direta ba konta bankária universidade-nian.
Molok atu implementa, FDCH sei halo sosializasaun iha Munisípiu-sira, nune’e distribuisaun bolsa estudu ne’e bele to’o mós ba estudante-sira iha área rurál.
Iha okaziaun ne’e mós parte Ministériu Ensinu Superiór Siénsia no Kultura ofisialmente asina diploma Ministeriál hodi reforsa programa ne’e.
Longuinhos dos Santos hateten, bolsa estudu hakbiit ba tinan ida ne’e na’in 910, ne’ebé sei koloka 410 ba Institutu Superiór Privadu-sira no 500 ba Institutu Superiór Públiku-sira.
Kritéria ba bolseiru ne’ebé atu hetan bolsa estudu hakbiit tenki sidadaun orijinál TL, iha deklarasaun hosi Ministériu Solidariedade Sosiál katak bolseiru ne’e kbiit la’ek duni, prienxe formuláriu ne’ebé sei hasai hosi FDCH, aprezenta Curríkulum Vitae no diploma abilitasaun akadémiku.
Antes ne’e Longuinhos dos Santos, entrega ona esbosu Dekretu-Lei ba Konsellu Ministru (KM) ho konteúdu atu regula estudante bolseiru iha rai-laran ne’ebé ho kategoria rejimi hakbi’it.
Jornalista: Tomé Amado
Editór: Cipriano Colo
