DILI, 25 fevereiru 2021 (TATOLI)-–Ministériu Asuntu Kombatente Libertasaun Nasionál (MAKLN) no Konsellu Kombatente Libertasaun Nasionál (KKLN) kria ona ekipa atu kontrola no monitoriza konstrusaun uma hamutuk 96 ba veteranu sira.
Governu aprova ona projetu dekretu Governu kona-ba regulamentu apoiu finaseiru ne’ebé sei atribui ba kombatente libertasaun nasionál ho valór $40.000 ba kada benefisiáriu, ne’ebé luta ba libertasaun nasionál durante tinan 20 to’o 24.
“Ami kria ona ekipa tolu ne’ebé kompostu hosi Ministériu, Konsellu Veteranu no Kombatate Libertasaun Nasionál durante tinan 24 ne’ebé sei ativu iha FALINTIL Forsa Defeza Timor-Leste (F-FDTL) atu kontrola no ezekusaun ba konstrusaun uma,” Ministru Asuntu Kombatente Libertasaun Nasionál (MAKLN), Julio Sarmento da Costa ‘Meta Mali’, informa iha Palásiu Governu, kinta ne’e.
Notísia relevante: Governu aprova apoia $40.000 ba kada veteranu konstrui uma
Ekipa tolu nia knaar maka sei halo verifikasaun no kontrola benefisiáriu 96 atubele konstrui uma ho di’ak tanba orsamentu ne’e transfere ona ba konta ida-idak.
“Ami kesi oituan ho lei ruma, nune’e hakarak lakohi orsamentu ne’e tenke halo uma, ne’ebé bainhira benefisiáriu la halo uma maka sei iha konsekuénsia,” nia akresenta.
Nune’e, nia dehan, iha tempu besik halo sei halo transferénsia orsamentu ba ekipa tolu atu hahú tuun halo monitorizasaun ba konstrusaun uma.
Biban hanesan, Prezidente KKLN, Vidal de Jesus ‘Riak Leman’, hateten ekipa sei tuun ba terrenu atu haree konstrusaun uma ba veteranu sira.
“Ita hakarak haree kada veteranu ne’e konstrui uma besik estrada ka dook, rai henek ne’e lalin dook ka besik, konstrui iha rai Estadu ou privadu. Kuandu iha rai Estadu ita presiza ko’alia atu fasilita trata dokumentu, nune’e iha futuru ema labele duni sira tuun sa’e,” nia hatutan.
Prezidente KKLN konsidera presiza duni halo monotorizasaun, nune’e bele veteranu sira bele hela iha uma dignu no sira nia hakarak.
“Ita haree Governu konstrui ona um ba veteranu sira iha munisípiu Manatuto no Lospalos, maibé veteranu sira la hela tanba distánsia dook hosi sira-nia to’os no atividade hakiak animál sira,” nia tenik.
Tuir dadus, kombatente ne’ebé tama kritéria la to’o 100, tanba balun mate no barak liu mai hosi Rejiaun I Lospalos, Rejiaun II Baucau no Viqueque inklui munisípiu sira seluk.
Jornalista: Florêncio Miranda Ximenes
Editora: Julia Chatarina
