DILI,25 fevereiru 2021 (TATOLI)—Ministériu Asuntu Kombatente no Libertasaun Nasionál (MAKLN) prepara ona ekipa atu re-verifika dadus veteranu sira ne’ebé rejistu iha tinan 2009, hafoin prosesa hodi halo pagamentu.
Tuir dadus hosi MAKLN no Komisaun Omenajen, veteranu ne’ebé rejistu iha 2009 hamutuk 100.000-resin.
“Dadus veteranu sira ne’ebé rejistu iha tinan 2009, foin verifika 14.000 hosi totál 100.020 tanba orsamentu laiha, tanba ne’e iha tinan ne’e ita prevee ona orsamentu atu kontinua halo verifikasaun,” Ministru Asuntu Kombatente Libertasaun Nasionál, Julio Sarmento da Costa ‘Meta Malik’, informa iha Palásiu Governu, kinta ne’e.
Governante ne’e dehan, daudaun ekipa prepradu atu tuun terrenu halo verifikasaun ba dadus, ne’ebé ekipa sira sei la fó fatin ba ema ne’ebé falsifika dokumentu hodi benefisia osan Estadu.
“Ita iha ona esperiénsia katak rejistu uluk ne’e iha veteranu falsu, tanba planu veteranu sei hatama ba fundu kuaze millaun $10. Tanba hafoin ekipa ba terrenu no hasai foto inklui identidade, identifika iha veteranu falsu mak asesu osan Estadu,” nia akresenta.
Ministru esplika, lei la fó dalan ba primu, subriñu ka bei-oan inklui alin ka maun uma lisan ida atu rejistu fali mártir ida nu’udar benefisiáriu, maibé autoriza de’it inan ho aman rasik, inklui maun alin no feen.
“Ami-nia ekipa verifikasaun mós la fó dalan ba sé de’it mak hakarak falsifika dokumentu, maski serbisu ne’e la’ós fasil,” nia hatutan.
Bainhira MAKLN deteta ema balun falsifika dokumentu, sei hapara asesu osan veteranu.
Iha biban ne’e, governante ne’e husu sidadaun ne’ebé deteta ema balun falsifika dokumentu, presiza halo keixa ba parte kompetente atu prosesa tuir lei.
“Ami enkoraja viziñu sira ne’ebé besik no hatene malu, atu halo keixa tanba la’ós ministériu no sekretáriu Estadu de’it mak bele buka, maibé bainhira sé de’it identifika bele hato’o keixa,” nia fó hanoin.
Biban hanesan, Prezidente Konsellu Kombatete Libertasaun Nasionál (KKLN), Vidal de Jesus ‘Riak Leman’, konsidera presiza halo verifikasaun rigorozu.
“Ema ne’ebé verifika dokumentu tenke independente, nune’e bele halo serbisu ho di’ak,” nia dehan.
Jornalista: Florêncio Miranda Ximenes
Editora: Julia Chatarina
