AINARO, 25 fevereiru 2021 (TATOLI)—Sekretáriu Estadu Kooperativa (SEKoop), Elizário Ferreira, apresia ezisténsia kooperativa multi-setorál Cocamau tanba halo jestaun di’ak.
“Ohin imi realiza Asembleia Jerál ba dala-18, ne’ebé hatudu katak imi-nia kooperativa la’o no funsiona ho di’ak ona, maibé presiza halo di’ak liután. SEKoop nafatin hamrik iha imi-nia oin atu suporta no hatudu dalan ba imi,” Sekretáriu Estadu Elizário tenik hafoin partisipa Asembleia Jerál Kooperativa Cocamau ba dala-18 iha postu administrativu Maubisse, munisípiu Ainaro, kinta ne’e.
Governante ne’e enkoraja kooperativa multi-setorál ne’ebé halo atividade produsaun kafé atu kontinua hatudu espíritu nafatin la’o ba oin.
“Kafé Maubisse to’o iha rai-li’ur, signifika ne’e esforsu ita-boot nia, tanba ne’e presiza serbisu maka’as atu halo kafé ne’e naran di’ak liután tanba ita-nia kualidade orgánika. Ita-nia rai metan ba kafé ne’e sentímetru 15 ona, entaun labele tau tan rai metan ka adubu kímiku ne’ebé bele estraga kafé nia fuan tanba kuandu estraga ona maka ita sei lakon iha merkadu mundu,” nia akresenta.
Sekretáriu Estadu nota katak grupu Kooperativa Cocamau opera iha tinan barak ona no iha esperiénsia barak.
“Iha progresu la signifika laiha desafiu, progresu ne’e sempre moris hamutuk ho dezafiu. Tanba ne’e ita-boot sira labele hola dezafiu ne’e hanesan obstákulu boot atu hakat, maibé tenke sai hanesan oportunidade atu dezenvolve ita-nia an,” nia hatutan.
Nia konsidera Asembleia Jerál ne’e nu’udar parte atu komunika ba malu ho entidade kooperativa.
Iha sorin seluk, Prezidente Kooperativa Cocamau, Julio Mendoca Martins, hateten kooperativa lokál ne’e hala’o atividade iha muti-setorál ne’ebé halo produsaun ba kafé de’it.
“Ami halo asembleia hodi hato’o progresu kooperativa Cocamau, halo restrutursaun ba membru, no hare programa sira ne’ebé sei implementa iha tinan 2021,” nia informa.
Kooperativa ne’e rasik eziste ona durante tinan 18 nia laran iha postu administrativu Maubisse, ne’ebé daudaun ne’e ho membru 695 no fundu $60.000.
“Kafé ne’ebé maka ami prodús, halo parseria ho Pasific Asia Resource Center Inter-People’s Cooperation (PARCIC), buka merkadu hodi fa’an fali ba rai-li’ur,” nia akresenta.
Iha kada tinan, kada membru bele prodús kafé kilograma 100 no mínimu kilograma 80.
“Kilograma ida $2,35 no ami ko’a $0,20 hosi membru sira hodi tau iha kooperativa no membru sira hetan $2,15 no liu tan $0,20, ne’ebé ko’a hosi kada membru kooperativa ne’e selu ba estrutura kooperativa, dada bee moos ba komunidade no halo atividade seluk,” Prezidente kooperativa esplika.
Líder Kooperativa ne’e apresia prezensa SEKoop iha Asembleia Cocomau no husu nafatin apoiu hosi parte tékniku no finansa atu lori kooperativa ne’e dezenvolve di’ak liután ba oin.
Jornalista: Natalino Costa
Editora: Julia Chatarina
