DILI, 02 marsu 2021 (TATOLI)—Sala Situasaun Sentru Integradu Jestaun Krize (SS-CIGC sígla portugés), realiza serimónia despedida ho membru Polísia Nasionál Timor Leste (PNTL) na’in 40, ne’ebé ohin dezloka ba Munisípiu Covalima hodi asegura área fronteira terrestre.
Misaun prinsipál hosi pesoál hirak ne’e iha Covalima mak hanesan, halo pasa revista no bandu movimentu durante periúdu serka sanitária, fó apoiu 100% ba parte saúde no administrasaun Munisípal atu bele hala’o serbisu.
Notísia Relevante:Governu kontinua aplika serka sanitária iha Covalima, autoriza transporta sasán
“Ita seidauk iha data determinasaun atu fila mai Dili, tanba depende ba periúdu serka sanitária no hein órden hosi Governu,” Segundu Adjuntu Operasaun ba Xefe Estadu Maiór Koordenadór Konjuntu SS-CIGC, Superintendente Marcos Sequeira, hateten ba jornalista-sira iha Centro Convenções Dili (CCD), tersa ne’e.
Kona-bá akomodasaun, Marcos Sequeira dehan membru hirak ne’e arranka ho buat ne’ebé iha no SS-CIGC sei trata nesesidade prinsipál-sira seluk atu haruka tuir.
Membru PNTL ne’ebé dezloka ba Covalima hamutuk na’in 40, inklui motorista na’in 12 ho karreta neen ne’ebé sei uza hodi halo operasaun durante estadia iha Munisípiu Covalima.
Jornalista: Felicidade Ximenes
Editór: Cipriano Colo
