DILI, 03 marsu 2021 (TATOLI)—Sekretáriu Estadu Kooperativa (SEKoop), Elizário Ferreira, hateten iha kooperativa haat ne’ebé lidera hosi feto, hanesan kooperativa uniaun kréditu la’o ho susesu no dezenvolve ho di’ak.
“Kooperativa ne’ebé lidera hosi feto iha ualu, maibé iha haat mak susesu iha kooperativa uniaun kréditu, na’in-haat seluk ladún la’o ho di’ak,” Sekretáriu Estadu Elizário informa iha ámbitu abertura semináriu ho tema ‘Dezenvolvimentu Kooperativa iha Post COVID-19’, iha Federasaun Hanai Malu, Bairro Pité, kuarta ne’e.
Kooperativa kréditu uniaun ne’ebé dezenvolve ho di’ak no lidera hosi feto maka Lakon Nakuku Mosu Naroman (LANAMONA) iha Maliana, Hikis Kosar Hadi’a Moris (HIKMOR) iha Aileu, Kooperativa Builale iha Ossu no Feto Haksolok iha Tuana-laran, Dili.
Tuir Sekretáriu Estadu, prinsípiu kooperativa kréditu maka hala’o atividade liña kréditu sosa no fa’an osan.
“Aleinde ne’e, grupu feto sira normalmente halo produsaun artezenatu hanesan halo tais ko seluk tan,” nia akresenta.
Iha sorin seluk, Prezidente Kooperativa HIKMOR Aileu, Lurdes Mendonca Ramos, hateten durante ne’e kooperativa fó kreditu ho funan 3%.
Tuir responsável ne’e, durante ne’e HIKMOR halo atividade rai osan, halo negósiu no kuda modo, hafoin halo parseiru ho loja iha Dili hanesan Kmanek Supermerkadu hodi fa’an produtu.
“Agora situasaun pandemia, Kmanek la ba foti, entaun ami rasik lori produtu ba merkadu,” nia hatutan.
Nia dehan, progresu seluk ne’ebé maka kooperativa ne’e iha maka konsege harii edifísiu permanente iha Aileu no hola transporte hanesan kamioneta ida no motor rua atu ajuda traballadór sira halo atividade loron-loron ba kolesaun osan.
Biban ne’e, nia parte husu ba SEKoop iha futuru karik bele kapasita membru sira tanba to’o agora kooperativa ne’e seidauk hetan oportunidade.
Kréditu uniaun HIKMOR hahú opera iha tinan 2013, ho fundu dahuluk $239 no agora atinje ona $199.000, ho membru hamutuk 272.
Jornalista: Natalino Costa
Editora: Julia Chatarina
