DILI, 04 marsu 2021 (TATOLI)—Rezultadu peskiza hosi Institutu Nasionál Siénsia Teknolojia (INCT sígla portugés) iha tinan 2019 hatudu katak, Governu abandona área edukasaun no turizmu iha Timor-Leste (TL).
Prezidente Ezekutivu INCT, José Cornélio Guterres esplika, rezultadu peskiza ne’ebé institutu ne’e halo, haree liu ba área prioridade neen mak hanesan edukasaun, turizmu, saúde, agrikultura, ekonomia no negósiu.
Notísia Relevante:INCT prioritiza programa tolu iha 2021
Iha área edukasaun INCT halo peskiza ba laboratóriu iha eskola-sira no deskobre katak, barak mak laiha fasilidade.
“Loloos Governu tenke prepara fasilidade iha eskola-sira atu bele tulun estudante-sira halo sira-nia peskiza. Maibé, Governu la investe,” José Cornélio Guterres hateten ba jornalista Agência Tatoli iha serbisu-fatin Balide, kinta ne’e.
Alende ne’e, INCT mós halo peskiza ba área turizmu ne’ebé konsege identifika fatin turizmu lokál iha Ataúro seidauk hetan atensaun.
“Ataúro poténsia bo’ot ba turizmu, maibe to’o agora Governu seidauk hahú dezenvolve,” nia dehan.
Rezultadu peskiza ne’e INCT sei hakerek sai livru-ida, atu nune’e universidade-sira inklui instituisaun Estadu-nian bele uza nu’udár referénsia, bainhira hakerek monografia ka halo planu dezenvolviméntu-ruma.
Peskiza sientífiku ne’e la’o di’ak tanba peskizadór-sira maioria dosente hosi Instituisaun Ensinu Superiór Privadu no Públiku, ne’ebé iha esperiénsia no kualidade.
INCT nu’udár sentru peskiza ba dezenvolvimentu Akadémiku no Ensinu Superiór-sira hodi halo inovasaun, ho nia estatutu hatuur iha Dekretu-Lei númeru 23 /2014, loron 3 Setembru.
Jornalista: Tomé Amado
Editór: Cipriano Colo
