DILI, 05 marsu 2021 (TATOLI)–Primeiru-Ministru (PM), Taur Matan Ruak, asiste direta teste materiál ba estrada hosi Timor Rock, ne’ebé iha terrenu hamutuk ho ekipa ke’e estrada hodi foti produtu ne’ebé antes ne’e tau ba estrada no lori ba teste iha laboratóriu.
“Ha’u akompaña halo teste ba produtu rua hosi Timor Rock ho konvensionál, ha’u kontente loos tanba haree iha kualidade, maski rezultadu laboratóriu mak sei determina. Ha’u hakarak ke’e hotu tanba ita labele krítika de’it, maibé tenke koko hodi sente, hau sensibilizadu haree tékniku sira ke’e obra sira-ne’e,” PM Taur hateten hafoin akompaña teste ba materiál estrada, iha estrada dirasaun Matadoro, Balide, sesta ne’e.
Tuir Xefe Governu, teste ba obra ne’e bele halo iha kualker tempu, maibé hakarak hatene produtu foun ne’ebé introdús, ninia sertifikasaun oinsá, tanba laboratóriu mak sei determina.
Biban ne’e, PM hato’o preokupasaun ho materiál laboratóriu Ministériu Obra Públika (MOP) ne’ebé mínimu tebes.
“Ha’u hanoin Ministériu Obra Públika ninia teste, ha’u imajina estrada metru 100 sira halo teste oras rua la hotu, signifika halo hosi Dili to’o Baucau lori tempu naruk. Entaun ha’u promete ba ministériu no laboratóriu katak tenke halo investimentu, hadi’a ekipamentu nune’e bele hakma’an sira-nia serbisu hodi presta ho kualidade ba emprezáriu no Estadu,” nia akresenta.
Xefe Ezekutivu hein relatóriu hosi tékniku sira kona-ba rezultadu laboratóriu teste, nune’e Governu bele hatene pasu saida mak sei halo iha tempu oin-mai.
“Buat ne’ebé ha’u hateten mak kuantu mais uza buat ne’ebé lais, ekonómiku, efisiente, kualidade ne’e di’ak liu ba ita-nia nasaun. Ita hadi’a estrada nasionál sira maibé estrada rurál sira iha problema barak, entaun se iha meiu ida halo ita la’o lais oituan, ha’u hanoin ne’e oportunidade ba ita,” PM subliña.
Nia dehan, setór privadu sira halo ona sakrifísiu no la’ós atu públiku krítika de’it maibé tenke rekoñese kontribuisaun, ho kondisaun nafatin apelu katak kualidade ne’e importante tanba la’ós di’ak de’it ba nasaun maibé ba sidadaun sira tanba buat ne’ebé gasta agora bele to’o iha jerasaun sira tuir-mai.
Biban ne’e, PM Taur orgullu ho empreza ne’ebé mak halo estrada ligadu Matadoro to’o Balide tanba hatudu duni kualidade no sai ezemplu di’ak ba emprezáriu sira seluk atu aprende.
Nia apela ba emprezáriu timor-oan sira atu serbisu hamutuk ho Governu asegura kualidade, hadi’a prestizu, kredibilidade, no naran.
Iha ámbitu asiste direta teste ba materiál estrada, PM Taur hetan akompaña hosi Ministru Obra Públika, Salvador Eugênio dos Reis Soares Pires, Prezidente Kámara Komérsiu Indústria Timor-Leste (CCI-TL, sigla portugés), Oscar Lima, Prezidente Konsellu Administrasaun IGE,I,P, Ermenegilda da Costa Laurentina, tékniku Ajénsia Dezenvolvimentu Nasionál (ADN), tékniku MOP, inklui tékniku sira hosi Timor Rock.
Materiál ho tipu aspál ne’e sei lori ba halo teste iha laboratóriu ADN no MOP, hafoin bele haree kualidade hosi produtu.
Jornalista: Antónia Gusmão
Editora: Julia Chatarina
