DILI, 06 marsu 2021 (TATOLI) – Timor Leste Coalition of Education (TLCE) konsidera formasaun karakter sidadania la’ós mai hosi edukasaun formál ne’ebé ninia matéria kontempla iha kurríkulu sira, maibé mai hosi formasaun iha komunidade.
Koordenadór TLCE, José Monteiro, ba Agência Tatoli via telefone, sesta (05/03), hateten formasaun karakter ne’e asuntu ida integradu, la’ós mai de’it hosi edukasaun formal maibé presizamente tenke forma iha nivel komunidade.
“Bainhira formasaun karakter ne’e hahú ona iha komunidade, maka instituisaun Estadu ne’ebé responsabiliza asuntu ne’e maka Sekretáriu Estadu Juventude no Desportu (SEJD). Sira mak sei prepara joven sira hodi halo mudansa iha revolusaun mentál,” José Monteiro hateten.
José Monteiro fó ezemplu ida bainhira estudante ensinu superior sira ne’ebé hala’o sira ninia estádiu iha komunidade nia leet, ida-ne’e parte ida hosi formasaun karakter mós. Basa, nia esplika, prezensa estudante sira nian iha komunidade ne’e atu ajuda ema seluk ne’ebé vulneravel ka laiha kondisaun.
Edukasaun ka formasaun karákter ne’ebé tuir José Monteiro nia perspetiva maka atu aprofunda maka edukasaun sidadania no nasionalizmu, nune’e bele forma ka aprofunda komunidade sira-nia pensamentu no mentalidade.
Jornalista : Tomé Amado
Editór : Francisco Simões
