VIQUEQUE 08 marsu 2021 (TATOLI)–Xefe suku Bibileo, postu administrativu Viqueque, munisípiu Viqueque, Maria Odete dos Anjos Amaral, husu ba feto sira atu labele lakon esperansa, maibé hatudu nafatin feto mós bele.
Líder komunitária hato’o asuntu ne’e relasiona ho loron feto mundiál iha 08 marsu, ne’ebé atu selebra konkista feto iha sosiál, ekonómika, kultura no polítika no iha loron ne’e marka mós asaun igualdade ba feto sira.
“Durante ne’e, públiku hanoin feto nia responsabilidade ba família uma-laran de’it, maibé feto mós bele iha karreira. Ha’u nia mesajen ba ha’u-nia maluk feto sira, ita nu’udar feto labele lakon esperansa, tenke hatudu nafatin katak ita feto mós bele,” Xefe suku Maria Odete, informa ba Agência TATOLI, iha salaun administrasaun minisípiu Viqueque, bainhira partisipa iha sosializasaun mapamentu risku dezastre naturál, ne’ebé realiza hosi Institutu Petróleu no Jeolojia (IPG, sigla portugés), segunda ne’e.
Tuir nia, iha konteksu Timor-Leste hetan independénsia, luta ba ukun-an la’ós mane de’it, maibé envolvementu feto.
Biban ne’e, nia rekoñese, fofoun sai Xefe suku hasoru dezafiu barak maibé konsege ultrapasa situasaun hirak ne’e.
“Ha’u la preokupa ho ema nia hanoin, tanba nu’udar líder ba suku ida tenke serbis ho fuan no aten boot, atu nune’e bele lidera povu ho di’ak no rezolve preokupasaun balun ne’ebé ita bele halo,” nia akresenta.
Nia dehan, durante ne’e, Xefe suku iha Bibileo sempre mane, maibé iha períodu ne’e nia konsege lori situasaun foun.
“Períodu hirak liubá, mane de’it maka sai Xefe suku, maibé ho ha’u-nia prezensa, nu’udar feto fiar katak sei lori dezenvolvimentu no mudansa iha suku ne’e,” Maria Odete otimista.
Nia haktuir, durante nia mandate hahú tinan 2017 to’o 2022, konsege halo mudansa ba suku Bibileo, liuhosi Programa Nasionál Dezenvolvimentu Suku (PNDS) konsege hadi’a moru eskola ensinu primáriu iha suku Bibileo no halo fatin halimar iha eskola pré-eskolar.
“Daudaun kontinua koopera ho Oganizasaun Naun Governamentál (ONG) lokál sira inklui parseiru dezenvolvimentu atu dezenvolve suku ne’e,” nia hatutan.
Jornalista: Natalino Costa
Editora: Julia Chatarina
