DILI, 08 marsu 2021 (TATOLI)--Governu liuhosi Ministériu Koodenadór Asuntu Ekonómika (MKAE) deside hapara provizóriu distribuisaun Cesta Bázika iha kapitál Dil, ne’ebé antes ne’e estende ona loron distribuisaun to’o 31 marsu.
“Ita deside suspende disribuisaun Cesta Bázika, efetivu iha loron hitu (hahú hosi aban to’o 15 marsu) hodi haree progresu COVID-19,” Ministériu Koodenadór Asuntu Ekonómika, Joaquim Amaral hatete hafoin reuniaun Konsellu Ministru iha edifísiu Ministériu Finansa (MF), Aitarak-laran, segunda ne’e.
Desizaun ezekutivu sira ne’e ho baze ba kazu pozitivu COVID-19 na’in-rua iha área BTN II Tasi-tolu, aldeia Terra Santa, suku Madohi, postu administrativu Dom Aleixo, munisípiu Dili.
Tanba ne’e, liuhosi reuniaun ezekutivu aprova ona rezolusaun ida hodi deside serka sanitária iha munisípiu Dili durante semana ida hahú husi loron 09 to’o 15- marsu.
Notísia relevante: Reuniaun KM: deside serka sanitária iha Dili durante loron hitu
“Atividade Cesta Bázika iha Dili mak suspende, maibé munisípiu seluk kontinua la’o,” nia akresenta.
Distribuisaun Cesta bázika iha Dili resposbiliza husi Ministériu Turizmu, Komérsiu no Indústria ne’ebé ninia progresu distribuisaun atinje ona 50%, hosi benefisiáriu hamutuk 287.770 ho modalidade voucher.
Loja sira ne’ebé mak fasilita voucher ba benefisiáriu sira iha Dili hamutuk 15 hanesan Lojo Amigu Toos Nain, Loja agrikultór, Jancito Supermarket, Lita Store, Lisun Supermarket, funan Bura, Acelda, Starking May Mart, Fitun, W four, Maubara no seluk tan.
Iha fulan kotuk, Ministériu implementadór distribui ona Cesta Bázika ba populasaun territóriu tomak hamutuk 900.000 no sei falta 595.000.
Jornalista: Florêncio Miranda Ximenes
Editora: Julia Chatarina
