DILI, 08 marsu 2021 (TATOLI) – Sala Situasaun Sentru Integradu Jestaun Krize (SS-CIGC) hola desizaun serka sanitaria privozoriamente iha área Tasi-Tolu, Dili, tanba deteta tan pasiente COVID-19 na’in-rua. Nune’e, domingu kalan (07/03), autoridade seguransa sira hamutuk ho ekipa SS-CIGC ba foti obrigatóriu pasiente na’in-rua iha BTN-II, Tasi-Tolu hodi submete ba konfinamentu obrigatóriu atu evita COVID-19 nakda’et iha komunidade (transmisaun komunitária).
Informasaun ne’ebé iha katak pasiente na’in-rua ne’e posivelmente da’et tanba dala-ruma iha kontaktu antes ho pasiente COVID-19 ida iha Baucau ne’ebé nia hela viziñu mós ho pasiente foun nain-rua ne’e.
Notísia Relevante : COVID-19: CIGC blokeia temporária aldeia Terra Santa tanba deteta pozitivu-rua
Oinsá maka pasiente ne’e hetan COVID-19 no to’o ohin loron nia kondisaun saúde iha konfinamentu obrigatóriu oinsá, Agência Tatoli, segunda ne’e, halo entrevista liuhosi telefone ho pasiente COVID-19 na’in-ida ho inisiál G hosi nain-rua ne’ebé SS-CIGC evakua, domingu kalan ne’ebá.
Pasiente ho inisiál G ne’e konta tuir katak iha loron 06 marsu, foin lalais ne’e, hahú hosi tuku 02:00 meiudia to’o tuku 04:00 loro-kraik, iha Sentru Juventude iha Tasi-ibun, Ministériu Saúde ho ekipa CIGC halo teste swab iha área BTN-II, Tasi-Tolu, hodi foti amostra hosi abitante sira hotu, inklui nia rasik no rezultadu fó sai iha kalan 07 marsu, purvolta tuku 19:00 Otl, hodi evakua kedas nia ho abitante ida tan ba sala konfinamentu obrigatóriu iha duni Tasi-Tolu.
“Horikalan sira (CIGC) telefone dehan ha’u nia rezultadu deteta,” pasiente ho inisiál G ne’e haktuir.
Iha loron 27 to’o 28 fevereiru 2021, pasiente G sente isin-manas, maibé depois konsumu vitamin C nia sente nia saúde rekupera hodi hala’o servisu hanesan baibain iha instituisaun estadu ida ne’ebé nia haknaar ba.
Ekipa CIGC no Ministériu Saúde rekolla ona informasaun hosi pasiente G kona-ba durante semana kotuk halo kontaktu ho se no iha fatin ne’ebé, nune’e bele prevene atu nakda’et ba abitante seluk.
Pasiente ho inisiál G ne’e hela iha BTN-II, maibé nia rezidénsia dook uitoan hosi pasiente COVID-19 hosi Baucau ho inisiál MM (tuir SS-CIGC nia informasaun), maibé loloos tuir kartaun eleitorál maka DA.
Nia dehan nia hatene pasiente ne’ebé evakua hosi Baucau mai Dili ne’e hela hotu iha área BTN-II, maibé sira nunka iha kontaktu fízika. Sa tan la’o ba malu.
“Ha’u nia uma moru as tebes. ha’u durante ne’e ba servisu no fila mai uma iha de’it uma, nunka iha kontaktu ho pasiente ida evakua hosi Baucau ne’e. Maibé ita hein de’it evolusaun sira hosi teste ne’e no submete ba desizaun sira hotu hosi SS-CIGC atu kontribui ba kombate propagasaun COVID-19,” pasiente inisiál G ne’e hateten.
Nia husu ba ekipa SS-CIGC ho MS atu kria kondisaun iha sala izolamentu nune’e bele suporta prosesu tratamentu saúde pasiente COVID-19 ninia bele rekupera ho lalais.
“Agora daudaun, ha’u laiha sintoma, maibé husu ba públiku atu labele pániku no husu MS ho SS-CIGC atu halo teste masál tanba virus ne’e ita la haree,” nia rekomenda.
Jornalista : Agapito dos Santos
Editór : Francisco Simões
