DILI, 10 marsu 2021 (TATOLI)— Sala Situação Centro Integrado Gestão de Crises (SS- CIGC), konsidera perevensaun no mitigasaun ba COVID-19 iha munisípiu Covalima to’o 9 marsu, iha progressu ne’ebé di’ak.
Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste, Rui Maria de Araújo, konsidera iha progressu di’ak tanba ekipa konjunta saúde iha Unidade Territoriál SS-CIGC Munisípiu Covalima, buka-tuir ona ema hotu-hotu ne’ebé hala’o kontaktu-besik ho kazu hirak ne’ebé antes ne’e detekta iha munisípiu ne’e, maibé rezultadu hotu-hotu hatudu negativu.
Notísia Relevante:Pozitivu foun tolu iha Dili, pasiente COVID-19 aumenta ba 51
“Horisehik, 9 marsu, kompleta loron 14 hafoin kazu estensionista agrikultura-nian, ne’ebé hela iha aldeia Onu Laran, suku Maudemu, Postu Administrativu Tilomar, halo kontaktu diretu ho kolega serbisu no mós ema seluk iha Suai Vila. Ema hotu ne’ebé tama iha kritériu kontaktu-besik hosi kazu ne’e, inklui nia oan nain-haat, funsionáriu Ministériu Agrikultura no Peska, viziñu sira, hamutuk ema na’in 75 no na’in 22 iha Suai Vila, halo ona segundu teste iha 8 no 9 marsu. Rezultadu hatudu negativu,” Rui Maria de Araújo fó-sai novidade ne’e iha Centro Convenções Dili (CCD), kuarta ne’e.
Ho negativu dala rua ne’e, nia dehan, signifika kontaktu-besik hirak ne’e, bele deklara ona libre hosi kontájiu virus SARS-CoV-2.
Alende ne’e, ekipa konjunta saúde iha Unidade Territoriál CIGC-SS Munisipiu Covalima, sei nafatin monitoriza situasaun iha Suku Belulik Leten, Postu Administrativu Fatumea no no kazu ikus-liu iha Postu Administrativu ida ne’e deteta iha 6 marsu.
“Kontaktu-besik hosi kazu konfirmadu 13, iha Suku Belulik Leten, balun segundu teste negativu ona, balun fali sei tenki teste iha loron hirak tuir-mai,” nia subliña.
Ho baze ba faktu-sira hanesan temi iha leten, Konsellu Ministru ohin deside ona atu hapara serka sanitária iha Munisipiu Covalima, maibé mantein nafatin serka iha Postu Administrativu Fatumea, to’o kompleta tan loron 14, sura hosi loron ne’ebé deteta kazu ikus-liu maka 6 marsu 2021.
Sei nafatin relasiona ho Munisipiu Covalima, Doutór Rui Maria de Araújo hakarak klarifika mós asuntu balun hanesan tuir-mai, iha loron 28 janeiru, 10 no 16 fevereiru 2021, liu hosi atividade vijilánsia sentinela iha Ospitál Referénsia Suai, rekolla amostra hosi bebé na’in-tolu ne’ebé iha infesaun respiratória aguda.
Nia esplika liu tan, sira-nia amostra hanesan mós ho amostra vijilánsia sentinela sira seluk, haruka mai Laboratóriu Nasionál Saúde iha Dili.
Iha 7 marsu, nia hatutan, Laboratóriu Nasionál Saúde informa ekipa konjunta saúde iha Covalima, katak sira-nia rezultadu pozitivu no ekipa konjunta saúde nian iha Covalima, kontakta kedas família hosi bebé na’in-tolu ne’e, hodi foti hikas amostra ba bebé sira-ne’e, atu bele sertifika se pozitivu duni ka la’e, hafoin foti mós amostra ba sira-nia família hamutuk ema na’in 35.
“Hosi análiza ba amostra hirak ne’ebé foti iha 8 marsu, hatudu rezultadu negativu hotu kedas,” nia dehan.
Akontesimentu ida ne’e halo ema balun iha komunidade Suai Vila nia le’et deskonfia katak, Governu halimar ho kazu COVID-19 no Governu mak inventa.
“Ida ne’e la loos tanba, repetisaun ba análiza ne’e, prosedimentu normál ne’ebé adopta iha laboratóriu hotu-hotu, bainhira iha dúvida kona-bá rezultadu ruma,” Rui Araújo klarifika.
Entretantu, to’o ohin, Sala Situação Centro Integrado Gestão de Crises (SS- CIGC), rejista tan kazu pozitivu foun tolu hosi munisípiu Dili no númeru pasiente iha sala izolamentu aumenta ba 51.
Jornalista: Felicidade Ximenes
Editór: Cipriano Colo
