DILI, 16 marsu 2021 (TATOLI)—Banco Central de Timor-Leste (BCTL) liuhosi sirkulár ne’ebé fó sai, define medida ba instituisaun finanseira durante períodu serka sanitária no konfinamentu obrigatóriu, ne’ebé impoin iha Dili to’o loron 02 abríl inklui Baucau no Viqueque to’o loron 29 marsu.
Medida ne’ebé define bazeia ba kompeténsia Banku Sentrál, ne’ebé iha poder eskluzivu atu regula, fó lisensa, rejista no superviziona instituisaun finanseira iha Timor-Leste.
Iha biban ne’e, BCTL autoriza banku inklui instituisaun legál ba depózitu, kompañia seguru, operadór transferénsia no kompañia Fintech halo redusaun ba operasaun iha lokál ne’ebé aplika konfinamentu obrigatóriu hosi Governu.
“Fó instrusaun ba instituisaun finanseira atu kontinua asegura asesu públiku ba servisu finanseiru esensiál sira,” refere nota ne’ebé Agência TATOLI asesu, tersa ne’e.
Notísia relevante: Governu deside estende serka sanitária iha Dili to’o 02 abríl
Enkuantu ba munisípiu ne’ebé la inklui iha períodu serka sanitária no konfinamentu obrigatóriu, servisu finanseiru ba públiku la’o hanesan bain-bain.
Sirkulár ne’e mensiona, instituisaun finanseira sira bele nafatin fó atendimentu ba levantamentu cash liuhosi balkaun tezouraria, mákina levantamentu automátiku (ATM), ka kanál seluk ne’ebé disponível iha territóriu nasionál.
Ajusta limite levantamentu másimu iha ATM ba $1.000 loron ida, asegura disponibilidade osan kualkér momentu iha ATM iha territóriu nasionál, no mantein entrada mínimu operasionál 98%.
Aleinde ne’e, asegura operasaun kanál pagamentu eletróniku hotu iha kualkér momentu inklui servisu e-wallet.
Kontinua disponibiliza públiku ho servisu finanseiru esensiál maibé la hapara konsesaun kréditu, transferénsia no seluk tan.
BCTL mós husu ba instituisaun finanseira, bainhira kliente ida halo levantamentu $1.000 mai kraik, bele halo transasaun liuhosi ATM.
Determina períodu funsionamentu instituisaun finanseira ba atendimentu públiku, hahú tuku 09:30 dadeer to’o tuku 14:00, iha lokál aplika konfinamentu obrigatóriu.
“Instituisaun finanseira tenke tau-matan ba medida preventiva hosi Governu iha territóriu nasionál,” apela BCTL.
Jornalista: Antónia Gusmão
Editora: Julia Chatarina
