DILI, 16 marsu 2021 (TATOLI)—Governu liuhosi Ministériu Administrasaun Estatál (MAE) halo ona koordenasaun ho Autoridade Munisípiu Dili (AMD) atu identifika ema hodi halo servisu iha semitériu Metinaro.
Notísia Relevante: Governu planea hari’i semitériu foun iha Metinaro
“Ita agora tama ba faze identifikasaun dadus ba rekursu umanu nian no tempu badak sei aprezenta dadus ba parte saúde hodi halo teste no treinamentu. Fiar katak marsu nia-laran bele konklui ona ema ne’ebé atu servisu iha semitériu Metinaro,” Vise-Ministru Administrasaun Estat’al, Lino de Jesus Torrezão, hateten ba Agência TATOLI liuhosi telefónika, segunda ne’e.
Ema ne’ebé atu servisu iha semitériu ne’e, Governante hateten, ne’e kompeténsia Ministériu Administrasaun Estatál nian, nune’e MAE fó ona autorizasaun ba Autoridade Munisípiu Dili (AMD) atu haree asuntu ne’e.
“Ami mós sei prepara ema ne’ebé servisu iha semitériu ne’ebá hodi atende mate no dadaun ne’e ami koordena ona ita-nia Autoridade Munisípiu Dili atu buka ema hodi haruka ba parte saúde hodi teste ba sira-nia isin inklui tuir treinamentu kona-ba oinsá atende haloot mate-isin no hatais sira,” Lino Torrezão hateten.
Tuir nia, MAE presiza ema hosi liur katak ema ne’e la’ós funsionáriu públiku maibé ema ne’e tenke prontu duni ba servisu iha semitériu. Iha ne’e, Autoridade Munisípiu Dili mak eskolla no define ona ema mínimu ema na’in 10-20.
Maibé, nia dehan, ema-ne’ebé servisu iha semitériu Metinaro ho rai hektare 12 ne’e tenke saudável no mental forte hodi atende mate no tau matan ba semitériu refere.
Kona-ba semitériu ne’e, nia hateten, téknikamente atu tuun loke estrada ba semitériu ne’e, MAE halo ona karta ba MOP atu loke dalan, nune’e lori mate ba hakoi no tenke prepara eskavadór ida ba ke’e rai-ku’ak.
“Ami tenke prepara ona para semitériu foun iha Metinaro tanba semitériu sira iha Dili ne’e nakonu ona,” nia dehan.
Membru Governu ne’e hateten, rai ne’ebé prepara ba semitériu foun iha Metinaro ne’e propriedade Estadu nian no fatin ne’e la besik iha komunidade nia hela fatin.
Notísia Relevante: Governu sei harii semitériu foun hodi substitui Semitériu Públiku Becuse
Jornalista: Osória Marques
Editór: Cancio Ximenes
