DILI, 16 marsu 2021 (TATOLI)–Ministériu Saúde liuhosi Servisu Autónomu Medikamentu no Ekipamentu Saúde (SAMES) prontu apoia materiál ba grupu Movimentu Tasi Moos (MTM) “Mama Bolu” hodi dizinfeta fatin públiku no área risku COVID-19 sira iha munisípiu Dili.
Diretora Armazenamentu no Distribuisaun SAMES, Saturlina Ximenes, apresia serbisu voluntarizmu hosi ekipa movimentu ne’e tanba halo ona dizinfekta iha área balun.
“Ami prontu suporta materiál dizinfekta sira ba Movimentu Tasi Moos hodi kontinua hala’o asaun voluntarizmu atu kombate COVID-19 ita-nia rai,” Diretora ne’e hateten iha ninia knaar fatin, Kampu-Alor, Dili, tersa ne’e, hafoin akompaña MTM halo dizenfeta areadór SAMES.
Notísia relevante: MTM kontinua dizinfeta fatin públiku ne’ebé risku ba propagasaun COVID-19
Nia dehan, materiál ne’ebé SAMES fornese mak hanesan kapa prevensaun no máskara atu proteje ekipa voluntáriu bainhira hala’o atividade iha zona mean, iha Dili.
Iha biban ne’e, SAMES husu ba komunidade iha área risku sira, atu hato’o pedidu ba MTM hodi dizinfekta ba fatin públiku, liuliu bairru no uma pasiente pozitivu COVID-19.
“Ami husu ba komunidade atu koopera ho ita-nia kolega sira ne’e, atu halo dizinfektasaun ba bairru sira ne’ebé risku ba vírus,” nia sujere.
SAMES prontu serbisu hamutuk ho MTM tanba nu’udar parte ida hosi polítika Governu halo prevensaun ba surtu ne’e.
Biban hanesan, Portavós MTM, Octávio Cardoso, agradese ba apoiu materiál ne’ebé bele ajuda hala’o atividade iha fatin públiku no área risku sira.
“Ami agradese ba SAMES, hanesan mós iha tinan kotuk sira oferese materiál lubuk ida,” nia akresenta.
Jornalista: Florêncio Miranda Ximenes
Editora: Julia Chatarina
