DILI, 17 marsu 2021 (TATOLI)-–Primeiru-Ministru (PM), Taur Matan Ruak, hateten, Governu prontu fó apoia umanitária ba estudante sira ne’ebé mak hela iha kost, maibé sei rekolla uluk dadus no problema prinsipál.
“Ami haree posibilidade atu fó apoia umanitária ba ita-nia estudante sira, maibé tenke identifika uluk ema na’in hira, hela iha ne’ebé de’it no problema saida. Tanba normalmente iha situasaun hanesan ne’e, ida ne’ebé la presiza mós presiza hotu, satán hanesan ita-nia rai ne’e, tanba ne’e maka ami presiza iha númeru atu hatene,” PM Taur informa hafoin ramata reuniaun ho Prezidente Repúblika, Francisco Guterres ‘Lú Olo’, iha Palásiu Prezidensiál, Bairro Pité, kuarta ne’e.
Notísia relevante: MESSK fahe formuláriu estudante hela iha kost ba universidade sira
Apoiu sei mai hosi Ministériu Solidariedade Sosiál no Inkluzaun (MSSI), ho númeru klaru no nesesidade konkreta.
“Buat ne’ebé mak ita bele halo, halo daudaun, kuandu labele halo ne’e labele. Tanba ita halo ona iha Covalima, ne’ebé bele halo mós iha Dili, ba ita-nia oan sira bainhira iha ona númeru loloos,” nia akresenta.
Enkuantu, Ministériu Ensinu Superiór, Siénsia no Kultura (MESSK) prepara no fahe ona formuláriu ba universidade sira, hodi estudante ne’ebé hela iha kost iha kapitál Dili bele prenxe atubele simu apoia umanitária hosi MSSI.
Alende ne’e, MESSK mós planu hela atu apoia maskára, sabaun no termu scanner ba kada universidade sira iha ámbitu luta kontra surtu COVID-19.
Jornalista: Antónia Gusmão
Editora: Julia Chatarina
