DILI, 25 marsu 2021 (TATOLI)—Ministériu Finansa (MF) liuhosi Sekretariadu Tékniku Fundu COVID-19, iha kinta (25/03), halo ona pagamentu ba kompañia fornesedór 25 Cesta Bázika, ho totál $5.257.302.
Númeru no montante ne’e inklui ona ho pagamentu ba kompaña 11 ne’ebé mak MF halo ona pagamentu iha sesta (19/03).
Tuir nota ne’ebé Agência TATOLI asesu iha kinta ne’e, pagamentu realiza hafoin MF simu pedidu pagamentu hosi ministériu implementadór, Ministériu Turizmu, Komérsiu no Indústria (MTKI) hamutuk 42.
Notísia relevante: MF foin simu pedidu pagamentu 42 Cesta Bázika hosi MTKI
“Pedidu pagamentu 11 sei realiza iha tempu badak nia laran, ne’ebé antes ne’e pedidu pagamentu 13 haruka filafali MTKI atu kompleta rekezitu pagamentu tuir lei haruka, molok realiza pagamentu,” refere nota hosi MF.
Aleinde ne’e, MF simu ona pedidu pagamentu hamutuk 24 hosi Sekretaria Estadu Kooperativa (SEKoop), ne’ebé hosi númeru ne’e, pedidu pagamentu sia sei realiza pagamentu iha tempu badak nia laran.
“Pedidu pagamentu 15, haruka filafali ba SEKoop atu kompleta rekezitu pagamentu tuir lei haruka, molok ministériu realiza pagamentu,” hatutan nota imprensa.
Notísia relevante: SEKoop simu dokumentu pedidu pagamentu fornesedór Cesta Bázika hamutuk 14
Iha semana ne’e nia laran, ekipa tékniku simu ona pedidu pagamentu hamutuk 16 hosi Sentru Lojístiku Nasionál (CLN, sigla portugés), maibé Sekretariadu Tékniku Fundu COVID-19 tenke haruka filafali atu kompleta rekezitu pagamentu molok realiza pagamentu.
“Ministériu Finansa liuhosi Sekretariadu Tékniku Fundu COVID-19 kontinua serbisu hamutuk ho ministériu implementadór programa Cesta Básize atu aselera prosesu pagamentu ba kompañia sira ne’ebé mak fornese ona ai-han populasaun”, subliña nota hosi MF.
Biban ne’e, Sekretariadu Tékniku Fundu COVID-19 bolu atensaun kompañia sira hotu kumpre dever selu impostu rendimentu (income tax) 0,5% hosi totál rendimentu konforme Lei Tributária haruka.
“Kompañia sira tenke aprezenta sira-nia resibu pagamentu impostu rendimentu ba Sekretariadu Tékniku, atu nune’e bele realiza pagamentu finál,” relata.
Karik kompaña fornesedór iha pergunta ka informasaun liután kona-ba asuntu impostu, bele dirije diretamente ba Autoridade Tributária (AT) ka bele vizita portál https://attl.gov.tl/ relasiona ho, pagamentu impostu, submisaun relatóriu mensál/annuál no pedidu emisaun ba Certidão de Dividas.
“Hakarak atu informa mós katak pagamentu impostu sira ne’e, bele halo liuhosi mákina Automated Teller Machine (ATM) P24, signifika kontribuinte sira la presiza forma iha banku komersiál sira hanesan uluk,” apela MF liuhosi nota.
Jornalista: Antónia Gusmão
Editora: Julia Chatarina
