DILI, 25 marsu 2021 (TATOLI)—Sentru Saúde Formoza (SSF), hahú halo sosializasaun no sensibilizasaun ba autoridade lokál iha Postu Administrativu Vera Cruz, Munisípiu Díli, kona-bá vasinasaun COVID-19 molok halo implementasaun.
Xefe SSF, Dulce Pinto Tilman, husu autoridade lokál hosi suku hitu iha Postu Administrativu ne’e atu kontinua halo sosializasaun no tenke sensibiliza komunidade atu simu no partisipa másimu iha programa imunizasaun ne’e.
Notísia relevante:Governu mantein tipu vasina AstraZeneca
“Ha’u husu ba xefe suku, xefe aldeia inklui delegada no delegadu-sira atu haforsa tan informasaun ne’e ba komunidade. Labele hatauk sira ho informasaun falsa (hoax), ne’ebé espalla iha média sosiál katak, vasinasaun ne’e sei hamate ema,” Dulce Pinto Tilman hateten ba jornalista-sira iha sede suku Mascarenhas, kinta ne’e.
Nia fó hanoin katak, vasinasaun AstraZeneca ne’ebé Governu hili laiha diferensa ho vasina ne’ebé komunidade simu rutina iha fasilidade saúde-sira.
“Ema ne’ebé hetan vasinasaun sei iha reasaun adversu hanesan isin manas no bubu iha fatin ne’ebé vasina durante loron rua,” nia subliña.
Xefe SSF ne’e garante katak, bainhira ema simu ona vasinasaun ne’e, ema nia isin sei iha imunidade forte atu kontra COVID-19.
Kritéria ba ema ne’ebé atu simu imunizasaun ne’e ho idade 18-59, liuliu sira ne’ebé ho kondisaun moras króniku hanesan hypertensaun, moras fuan, diabetes no iis boot.
“Ema sira ne’ebé ho kategoria hanesan ne’e mak tenki hetan vasinasaun atu bele haforsa fali sira-nia imunidade,” nia subliña tan.
Dulce Pinto Tilman husu ba komunidade ne’ebé tama iha kategória hanesan ne’e labele tauk atu simu vasinasaun tanba seidauk iha estudu ida ne’ebé prova katak, ema mate tanba vasinasaun ne’e.
Iha fatin hanesan, Xefe Suku Mascarenhas, Rui Elídio de Araújo, hateten hanesan líder komunitáriu sei toma responsabilidade atu fahe informasaun ba komunidade, nune’e bele partisipa iha programa ne’e.
“Ha’u orgullu ho sosializasaun no sensibilizasaun ne’e, atu bele haloos tiha informasaun hoax ne’ebé espalla iha média sosiál. Ha’u sei fó informasaun loloos ba komunidade,” nia promete.
Xefe Suku ne’e mós konsidera katak, xave loloos iha autoridade suku nia liman, informasaun sira ne’ebé hetan ona hosi parte saúde, labele nonok no tenki fahe ba komunidade.
Tanba ne’e nia promete katak, hahú ohin ba oin suku hitu ne’e sei halo sensibilizasaun no sei kontinua halo bebeik tanba komunidade oras ne’e konsidera COVID-19 hanesan polítika ka projetu Governu-nian.
“Ha’u sei fó orientasaun makaas ba xefe aldeia sira inklui delagadu no delagada sira atu espalla nafatin informasaun iha ida-idak nia bairru,” nia mós promete.
Nune’e mós Xefe Suku Lahane Osidentál, Francisco Smith konsidera vasinasaun ne’e importante atu nune’e bele haforsa imunidade ema ida-idak nian hodi kontra COVID-19.
“Ita iha komitmentu atu divulga informasaun ne’e ba komunidade suku Lahane Osidentál, nune’e bainhira programa ne’e implementa, labele hamosu dúvida,” nia deklara.
Entretantu, suku hitu ne’ebé pertense ba Postu Administrativu Vera Crus mak hanesan, Suku Dare, Lahane Osidetál, Mascarenhas, Caicoli, Vila Verdi, Colmera no Motael.
Iha 17 marsu, Primeiru-Ministru (PM), Taur Matan Ruak hateten, Governu deside mantein tipu vasina COVID-19 ho tipu AstraZeneca tanba halo ona konsulta ho Organizasaun Mundiál Saúde (OMS) no entidade relevante-sira.
Tuir planu, Governu sei realiza vasinasaun ne’e iha 7 abril tinan ne’e ho nia tarjetu dahuluk bá pesoál sira ne’ebé serbisu iha liña frente hanesan pesoál saúde, jornalista, F-FDTL, PNTL, Água no Saneamentu, EDTL no Alfándega.
Notísia relevante:Governu sei sosializa vasinasaun AstraZeneca durante fulan rua
Jornalista: Tomé Amado
Editór: Cipriano Colo
