DILI, 25 marsu 2021 (TATOLI)–Prezidente Asosiasaun TANE Konsumidór, António Ramos da Silva ‘Naikoli’ husu ba operadór telekomunikasaun sira atu oferese servisu di’ak ba sidadaun iha situsaun períodu Estadu Emerjénsia no Serka Sanitária.
“Husu ba operadór sira, iha situasaun hanesan ne’e, haree hadi’a ita-boot sira-nia prestasaun servisu no labele prejudika konsumidór sira tanba populasaun barak la satisfaz ho servisu públiku esensiál hanesan rede ba internet iha loron ikus,” Prezidente TANE informa iha ninia knaar fatin, Villa-verde, kinta ne’e.
Nia nota, iha kondisaun balun mak operadór sira ninia tarifa aumenta maibé kualidade servisu ladún di’ak.
“Ezemplu ema foin uza pakote internet $20 ba fulan ida maibé seidauk fulan hotu ona, ne’e hanesan manipulasaun ba konsumidór sira,” nia akresenta.
Notísia relevante: Tane Konsumidór Konsidera Iha Períodu EE Presiza Garante Servisu Telekomunikasaun
Tuir nia, durante implementasaun Estadu Emerjénsia no Serka Sanitária, asosiasaun ne’e rejista keixa balun hosi públiku liuhosi pájina ofisiál TANE no balun via whatsApp.
“TANE Konsumidór simu reklamasaun direita no indireita hosi konsumidór sira ba servisu esensiál hanesan operadór telekomunikasaun sira no ita hotu akompaña no sai vítima,”
Iha biban hanesan, TANE husu ba Governu liuhosi Autoridade Nasionál Komunikasaun (ANC, sigla portugés) nu’udar órgaun reguladór atu fó medida forte ba operadór telekomunikasaun sira bainhira ladún hatuur didi’ak direitu ba konsumidór sira.
“Durante períodu ne’e operadór sira labele prejudika sidadaun sira tanba ema hotu serbisu iha uma no labele halo movimentu inklui estudante eskola iha uma,” Prezidente TANE hatutan.
Nune’e, asosiasaun ne’e husu Governu atu kontempla iha medidia sira ne’ebé Governu foti hodi apoiu konsumidór sira.
“Dezde iha Estadu Emerjénsia dahuluk, TANE husu kedan servisu esensiál hanesan telekomunikasaun tenke kontempla iha medida sira ne’ebé Governu foti, hanesan fó subsídiu ba estudante sira no ema serbisu sira. Husu mós atu operadór sira hatun tarifa,” nia katak.
Jornalista: Natalino Costa
Editora: Julia Chatarina
