DILI, 26 marsu 2021 (TATOLI)—Governu Xineza liu hosi ninia Embaixada iha Timor-Leste (TL) oferese tan ekipamentu prevensaun COVID-19, ba Minsitériu Saúde (MS) atu fasilita pesoál liña frente-sira, iha luta kombate surtu ne’e.
Hafoin simu ekipamentu hirak ne’e, Vise-Ministru Saúde Bonifácio ‘Maucoli’ dos Reis agradese ba Governu Xineza ne’ebé sempre fó apoiu atu luta kombate surtu COVID-19, desde inísiu to’o ohin loron.
Notísia relevante:Governu Xineza oferese máskara rihun 40 ba TL
“Agardese ba Governu Xineza liu hosi ninia Embaixadór no mós jestór China Harbor Timor ne’ebé ho disponibilidade, hodi oferese ekipamentu prevensaun atu luta kontra moras ne’ebé agora sai krítiku iha ita-nia rain,’’ Bonifácio ‘Maucoli’ dos Reis, hateten ba jornalista-sira iha Armazén SAMES (26/03).
Governante ne’e rekoñese katak, Governu Xineza la’ós foin mak apoia TL, maibé desde inísiu bainhira enfrenta difikuldade ba ekipamentu protesaun individual, nasaun ne’ebé apoiu uluk mak Xina.
Tanba ne’e, Bonifácio espera katak, ho apoiu ne’ebé iha bele fasilita diak liu tan ema hotu ne’ebé hamriik iha oin hodi kontra COVID-19 no bele lori rai ne’e livre hosi virus aat ne’e.
Iha fatin hanesan Embaixadór Xina iha TL, Xiao Jiangu, hato’o katak, Xina sempre ajuda nafatin Timor Leste iha kualkér situasaun, liuliu iha situasaun atuál.
“Hamutuk ho ami-nia kompañia-sira iha TL sempre ajuda, tanba ami mós hatene situasaun COVID-19 iha ne’e difísil tebes. Maski buat hotu-hotu paradu, maibé ami esforsu hodi ajuda,’’ Xiao Jiangu hateten.
Ekipamentu Protesaun Individuál (PPE) COVID-19 ne’ebé Governu Zineza oferese mak hanesanMáskra, Luvas, Hand Sanitizer no Alkól.
Antes ne’e Governu Xineza liuhosi ninia embaixada iha Dili, oferese ona apoiu barak ba Governu Timor-Leste, liuliu ba instituisaun relavente-sira ne’ebé serbisu iha liña oin hodi kombate COVID-19.
Notísia relevante: Embaixada Xina Apoia Máskara Kaixa Tolu ba SEKOMS no Mídia Estadu
Jornalista: Felicidade Ximenes
Editór: Cipriano Colo
