DILI, 26 marsu 2021 (TATOLI)-–Governu liuhosi Ministériu Obra Públika (MOP), Diresaun Nasionál Estrada, Ponte no Kontrolu Cheia (DNPCC, sigla portugés) akompaña ona aprezentasaun ezbosu dezeñu detalladu finál hosi Konsultór Detile, ba reabilitasaun estrada munisipál Laga-Baguia, munisípiu Baucau ho distánsia kilómetru 30, molok loke konkursu públiku iha tinan ne’e.
Parte DNPCC husu konsultór aselera prosesu no garante kualidade dezeñu ba utilizasaun movimentu transporte públiku ne’ebé sei benefisia dezenvolvimentu ekonómiku.
“Ita ho konsultór halo estudu ba trosu ne’e no iha ona faze finál, fulan oin (abríl) mai sei haruka ba Ajénsia Dezenvolvimentu Nasionál (ADN) verifika no Komisaun Nasionál Aprovizionamentu (CNA, sigla portugés) hodi loke konkursu públiku ne’ebé sei dura bele to’o fulan lima to’o neen, ne’ebé bainhira hetan kompañia kualifikadu mak foin bele implementa obra,” Diretór Nasionál Estrada, Ponte no Kontrolu Cheia, João Mário Gama de Sousa, informa ba Agência TATOLI iha ninia knaar fatin, Comoro, Dili, sesta ne’e.
Orsamentu ba reabilitasaun estrada prevee ona iha Orsamentu Jerál Estadu (OJE) 2021, maski nune’e ezbosu dezeñu detalladu atrazu oituan tanba situasaun pandemia globál.
“Ami kalkula iha outubru ou novembru 2021 foin bele hahú reabilitasaun tanba tuir planu loloos sedu liu ida ne’e,” nia akresenta.
Nune’e, DNEPCC akompaña asisténsia dezeñu enjeñeiru detalladu hosi kompañia Konsultór Detile, ne’ebé iha sujestaun tékniku ba dezeñu balun ne’ebé presiza halo detalladu no kualidade.
“Ita deteta iha ponte ida sira halo estudu maibé seidauk kompletu ho estudu ba rai, liuliu haree ba sedimentasaun ne’ebé akontese barak ona iha ponte Timór laran tomak. Konkluzaun estudu kuaze 95% di’ak ona, falta oituan de’it sira hadi’a no hatama fali mai DNEPCC hodi prosesa ba ADN hodi verifika,” nia hatutan.
Kona-ba kustu totál obra ne’e, DNEPCC seidauk bele fó sai montante tanba ADN seidauk verifika no kestaun respeita Lei Aprovizionamentu katak orsamentu obra ida kuandu atu loke konkursu públiku seidauk bele fó sai montante.
Iha kestaun ne’e, CNA mak bele fó sai kustu obra ba públiku maibé hafoin anunsiu konkursu públiku.
Tuir Diretór, konsultór mensiona dadus uma, rai no ai-horis afetadu iha estudu detalladu projetu.
“Ita iha konsultasaun públiku ne’ebé realiza ona ho autoridade lokál inklui afetadu sira hodi hatama hamutuk iha dokumentu finál obra ne’e. Nune’e, ho dadus sira Governu sei foti medida hanesan kompesasaun ba afetadu molok komesa reabilita obra ne’e,” nia hatutan.
Jornalista: Florêncio Miranda Ximenes
Editora: Julia Chatarina
