DILI, 29 marsu 2021 (TATOLI)—Sala Situasaun, Sentru Integradu Jestaun Krize (CIGC, sigla portugés), enkoraja ekipa liña frente atu labele lakon vontade serví povu no nasaun iha ámbitu kombate COVID-19 iha Timor-Leste.
“Aproveita oportunidade ne’e, enkoraja profesional saúde sira, hahú hosi pilar I to’o IX, atu labele lakon vontade hodi nafatin serví ho profesionalizmu liuhosi dedikasaun tomak hodi kombate vírus globál ne’e,” Koordenadór Estadu-Maiór, Sala Situasaun CIGC, Komodoro Donaciano Costa Gomes ‘Pedro Klamar Fuik’, apela liuhosi vídeo konferénsia iha ámbitu reuniaun Konsellu Ministru estraordinária, bainhira hato’o aprezentasaun kona-ba pontu situasaun epidiomolójika nasionál, segunda ne’e.
Atuál Diretór Institutu Defeza Nasionál (IDN) ne’e konsidera, presiza hasa’e vontade sidadaun sira hosi nível hotu.
“Husu ita hotu, tantu sidadaun bainbain, líder kiik to’o líder boot, hamutuk konjuga sinergia hosi parte hotu no husu halakon interese polítika hodi tau forsa hamutuk, hodi batalha vírus ne’ebé oras ne’e hahú invade ita-nia rain,” Komoro Pedro Klamar Fuik apela.
Koordenadór Estadu-Maiór rekomenda ba entidade munísipiu Dili tenke implementa konfinamentu obrigatóriu no intensifika serka sanitária ho rigor.
Aleinde ne’e, rekomenda mós autoridade munisípiu Baucau no Viqueque, tenke intensifika serka sanitária hosi ekipa pilar III Ministériu Saúde sira hodi buka tuir kontaktu besik sira.
Jornalista: Antónia Gusmão
Editora: Julia Chatarina
