DILI, 29 marsu 2021 (TATOLI)–Timor-Leste prepara hodi prenxe rekizitu, nune’e bele adere ba membru Organizasaun Mundial Komérsiu (WTO, sigla inglés).
Governu Timor-Leste liuhosi ekipa lideradu hosi Ministru Koordenadór Asuntu Ekonómiku (MKAE), Joaquim Amaral, halo preparasaun partisipa iha enkontru daruak ba negosiasaun nível a’as Grupu Traballu WTO ou ‘Second Working Party Meeting’ , ne’ebé posível sei realiza iha juñu 2021.
Tuir nota imprensa ne’ebé Agência TATOLI asesu iha segunda ne’e relata katak, iha loron 01 outubru 2020, Timor-Leste partisipa ona iha enkontru dahuluk Grupu Traballu ne’ebé estabelese iha loron 07 dezembru 2016.
Ekipa hosi Timor-Leste antes ne’e elabora dokumentu kona-ba adezaun Timor-Leste ba WTO, ne’ebé hetan ona apresiasaun a’as hosi membru WTO no mós sekretariadu organizasaun iha Jenebra.
Haree ba seriedade Governu atu adere ba WTO, maka Sekretariadu iha Jenebra kontinua husu Timor-Leste nia disponibilidade hodi partilla esperiénsia kona-ba oinsá organiza enkontru Grupu Traballu bele la’o ho susesu, kompara ho Somalia ne’ebé hahú planu ‘First Working Party Meeting’ hosi dezembru 2016 maibé to’o agora seidauk realiza.
“Ho nune’e sekretariadu WTO hakarak tebes atu rona rasik oinsá Timor-Leste nia esperiénsia liuhosi enkontru Second Working Party Meeting,” subliña nota ne’e.
Haktuir hosi publikasaun ne’ebé fó sai hosi WTO Accessions News Letter, edisaun 104, marsu 2021, Grupu Traballu daudaun ne’e finaliza hela faze negosiasaun kona-ba kontribuisaun hotu inklui resposta eskrita bazeia ba pergunta hotu ne’ebé hato’o hosi país membru organizasaun mundiál ne’e.
Komponente hosi resposta, sei kobre hahú faze inísiu hodi asesu ba merkadu liuhosi sasán no servisu ne’ebé mak iha inklui Planu Asaun Lejizlasaun no lista verifikasaun kona-ba adezaun hamutuk kuestionáriu ho tabela apoiu agrikultura.
“Informasaun hotu hosi pergunta ne’e, ekipa negosiasaun ne’ebé lidera hosi MKAE sei haruka ba Sekretariadu WTO iha Jenebra, Suíça hodi sai baze diskusaun kona-ba rejime komérisu esternál Timor-Leste,” nota ne’e esplika.
Enkuantu, kompozisaun ekipa nagosiasaun ne’ebé lidera hosi MKAE reprezenta hosi instituisaun Estadu xavi sira hanesan Ministériu Negósiu Estranjeiru no Kooperasaun (MNEK), Ministériu Turizmu, Komérsiu no Indústria (MTKI), Ministériu Petróleu no Minerál (MPM), Ministériu Agrikultura no Peska (MAP), Ministériu Saúde (MS) no Ministériu Finansa (MF).
Aleinde ne’e ekipa negosiasaun halo mós konsultasaun ho parte relevante seluk hodi bele sai mós na’in ba prosesu ne’e, nune’e hetan apoiu hosi Ministériu Obra Públika (MOP), Ministériu Transporte no Komunikasaun (MTK), Banku Sentrál Timor-Leste (BCTL, sigla portugés) inklui setor privadu, sosiedade sivíl, no parseiru dezenvolvimentu sira.
Ekipa negosiasaun sira kontinua halo diskusaun iha nível multilaterál, dokumentu input negosiasaun ne’ebé foin finaliza sei sai hanesan baze ba Timor-Leste nia negosiasaun bilaterál no plurilaterál ho membru WTO sira.
Iha preparasaun negosiasaun bilaterál, membru ekipa negosiasaun balun foin lalais kompleta treinamentu virtuál ba Services Sector, hamutuk ho país observadór seluk, ne’ebé fornese hosi Sekretariadu WTO.
Objetivu husi treinamentu ne’e hodi fasilita ekipa negosiasaun iha preparasaun ba Services Negotiations ne’ebé sei realiza iha tinan ne’e nia laran.
Oras ne’e, Governu Timor-Leste hamutuk ho país 22 sira seluk sai país observadór hodi akompaña prosesu tomak kona-ba rekezitu sira atu sai membru WTO hanesan ho nasaun 164 sira seluk.
Organizasaun Mundial Komérsiu nu’udar organizasaun ne’ebé trata regra sira komérsiu entre nasaun ho objetivu hodi garante atividade komersiál hotu la’o ho livre inklui predisaun hotu.
Jornalista: Antónia Gusmão
Editora: Julia Chatarina
