DILI, 29 marsu 2021 (TATOLI)—Xefe Bankada União Democrática Timorense (UDT), Deputadu Francisco David Xavier Carlos, husu VIII Governu Konstitusionál fó de’it subsídiu diretamente ba povu nune’e povu iha kapasidade kona-ba kualidade kompra.
Nia hatutan, implementasaun cesta bázika ne’ebé la’o tiha ona la efisiénsia tanba cesta bázika fahe iha situasaun COVID-19 nia laran no populasaun sira ba hobur malu, ne’ebé la aplika distansiamentu sosiál no balun la uza maskára.
“Ita haree ne’e nia lójika ne’e laiha. Ita dehan distansiamentu sosiál ao mesmo tempu implementa cesta bázika. Mekanizmu ida di’ak mak fó osan direta ba kada família. Importante mak tuir prosesu, ema ne’ebé ke iha rendimentu $500 ba leten, labele simu. Maibé, ita haree katak tanba COVID-19, hotu-hotu enfrenta situasaun ne’e no hotu-hotu bele simu. Iha inísiu fahe subsídiu $200 kada família, ida-ne’e mak di’akliu,” Xefe Bankada UDT ne’e informa ba Agência TATOLI, relasiona ho VIII Governu hahú introdús medida foun atu fó apoia umanitária no sosiál ne’ebé atu resposta sósiu-ekonómiku iha rai laran, iha varanda prinsipál Parlamentu Nasionál nian, segunda ne’e.
Francisco David Xavier Carlos hatutan, Bankada UDT dúvida ho medida sósiu-ekonómika tanba haree ba kualidade governasaun atuál. Governu agora, nia dehan, dezesperadu uitoan hodi fó atendimentu ba situasaun sira hanesan ne’e, tanba cesta bázika ne’e la’ós rekuperasaun ekonomia maibé ida-ne’e hanesan apoia ida-ne’ebé ba povu hodi sustenta sira-nia moris.
Nia kontesta uitoan kona-ba korridór ekonomia ne’ebé la funsiona normál, maibé loja balun obriga taka no povu rasik atu fa’an sasán mós haruka taka, tanba konsekuénsia hosi serka sanitária no konfinamentu obrigatória ne’e.
Tanba ne’e, Xefe Bankada UDT ne’e husu Governu atu halo uluk estudu, labele halo buat hotu-hotu ansiozu no dezesperadu ho situasaun atuál, ne’ebé foti medida balun la korresponde ho povu nia moris atuál.
“Pontu de vista UDT nian ne’e la’ós rekuperasaun ekonomia ida. Ita haree katak cesta bázika ne’e kompañia sira mak hadau-malu hodi halo fornesimentu. Ita haree kompañia fornesedór barak mak Governu seidauk paga. Maibé povu sente ida-ne’e hanesan apoiu ida ba sira iha vijénsia COVID-19,” nia dehan.
Xefe Bankada UDT hein Governu nia proposta-alterasaun liuhosi orsamentu retifikativu hodi fó resposta sósiu-ekonómika iha rai-laran ne’ebé hatudu resesaun.
Jornalista: Evaristo Soares Martins
Editór: Cancio Ximenes
